د ملی امنیت د لوی ریاست ځواکونو د عنایت الله طاقت په مشری ، چې پخوا په غزنی ولایت کې د ولایتی شورا کاندید وو، سړی تښتونکو یوه ۶ کسیزه ډله په غزنی او کابل کې نیولی ده. دی سړی تښتونکی ډلی نجیب الله د ریدی ګل زوی چې د غزنی ولایت د واغز ولسوالی اوسیدونکی دی د پیسو په موخه تښتولۍ وو او د غزنی ولایت د ګډوالو په ښارګوټی کې په یوه څاه کې ساتل کیده د ملی امنیت ځواکونو له لوری ازاد او خپلی کورنی ته وسپارل شو.

په یو بل اقدام کې دوه سړی تښتونکی په نامه د عبدالاحد د عبدالحی زوی او نظام الدین د شرف الدین زوی چې د هرات ښار د اومی او نهمی ناحیو اوسیدونکی دی نیول شوی دی. دوی محمد عسی د حاجی موسی خان زوی چې د هرات پوهنتون د اقتصاد پوهنځی محصل وو د هرات ښار د لسمی ناحیی څخه له تښتولو وروسته وژلی وو.

د ملی امنیت زړور ځواکونه د امنیت د تامین او ټولنیز نظم په موخه شپه او ورځ هڅه کوی چې سرغړونکی د قانون منګلو ته وسپاری.