د نیکمرغه کوچني اختر د را رسېدو په مناسبت د افغانستان د اسلامي جمهوریت د جمهور رئیس محمد اشرف غني په نامه د ایران د اسلامي جمهوریت د جمهور رئیس حسن روحاني لخوا کابل ته د مبارکۍ پیغام را رسېدلی دی.


په پیغام کې ویل شوي دي، د کوچني اختر د را رسېدو له امله تاسو جلالتمآب، د افغانستان دولت او افغان مسلمان ملت ته مبارکي وایم، هیله لرم چې د دغه نیکمرغه اختر په درشل کې د ټولو اسلامي هېوادونو په همکارۍ د اعتدال او عقلانیت له مخې په ټوله نړۍ کې، په ځانګړي ډول د اسلامي امت ترمنځ له پخوا لا زیات د سولې، آرامتیا او تل پاتې امنیت د پراختیا شاهدان و اوسو.


د لوی خدای له دربار څخه ستاسو جلالتمآب د روغتیا او بریالیتوب او د افغانستان د دولت او ملت د سرلوړۍ او نیکمرغۍ هیله کوم.