د پکتيا د کرنې رياست چارواکي وايي چې سږکال یې د دې ولايت په لسو ولسوالیو کې تر ۱۰۰۰ جريبه زياته ځمکه باندې باغونه جوړ کړي دي.
د پکتيا د کرنې او اوبو لګولو ريس ذبيح الله حسن زي نن ازادي راډیو ته وویل چې له باغدارانو سره به تر ثمر پورې د باغونو په پالنه او روزنه کې هم مرسته کوي.
نوموړی زياتوي چې په ټولو ولسواليو کې يې خاورې ته په کتو به د میوو ېباغونه جوړ کړي.
بلخو په کونړ ولایت کې د څه باندې ۷۰۰ ښځو د اقتصادي پیاوړتیا په هدف د باغونو جوړول پیل شول.
د کونړ د کرنې او اوبو لګونې ریاست مشر عبدالغیاث نن وویل چې په دغو باغونو کې ښځې سبزیجات کري او بیا یې خرڅوي.
ښاغلی غیاث وايي چې دغه باغونه د اووه نیم سوه میلیونه افغانیو په لګښت جوړیږي چې په کې یو شمېر زیاتو ښځو ته د کار زمینه برابریږي.
غیاث وايي چې د باغونو د جوړولو ترڅنک ښځو ته اصلاح شوي تخمونه او د باغ د کار کولو وسایل هم ورکول کیږي.
د کرنې او اوبو لګونې ریاست وايي، هڅه کوي چې په کونړ کې د ښځو د اقتصادي پیاوړتیا لپاره نورې پروژې هم عملي کړي.