د خوست مدني فعالان په دې ولایت کې د بشري حقونو د سیمه ییز دفتر پرانستل غواړي. دوی وایي، پر نفوسه ولایت دی، د بشري حقونو دفتر فعالیت نه لري چې له همدې امله د بشري حقونو ځینې سرغړونې پټې پاتې کېږي.

د آوا غږ ( آوا ) آژانس د خبر له مخې : د خوست مدني فعالان وایي، دلته له بشري حقونو ځینې سرغړونې پټې پاتې کېږي چې له امله یې د پېښو په ګراف کې هم لوړوالی راځي.

د پوهنتون استاد هلال ارشاد وايي:”خوست ولایت ډېر نفوس لري له همدې کبله بايد چې دلته د بشري حقونو د کميسيون څانګه پرانستل شي ترڅو له بشري حقونو سرغړوونکي په کې ثبت کړل شي او داسې پېښې پټې پاتې نه شي.”

مدني فعال نجیب الله الوخېل وايي: “خوست ګڼ نفوسه ولایت دی، دلته په لرو پرتو سيمو کې خويندې له ډېرو محروميتونو سره مخ دي، نو دلته د بشري حقونو سيمه ييزې څانګې ته ډېره اړتيا ليدل کېږي.”

په خوست ولایت کې د مدني ټولنې او بشري حقونو بنسټ فعالیت کوي. د دغه بنست ولایتي مسؤل بوستان وليزی هم د بشري حقونو سرغړونې پېښې زیاتې بولي: “په خوست کې د بشري حقونو د سيمه ييزې څانګې پرانستل ډېر اړين دي.”

له بلې خوا په سویل ختیځ زون کې د بشري حقونو د خپلواک کمېسیون ویاند عادل عزيزي وایي: “په دې اړه مو مرکزي دفتر ته څو ځلې وړانديز کړی خو تر اوسه یې منظوري نه ده راغلي.”

کتونکي په دې باور دي چې که په خوست کې د بشري حقونو خپلواک کمېسیون څانګه پرانستل شي، نو له یوې خوا به د زور زیاتیو پېښې ثبت او مسولو حکومتي بنسټونو ته ورسېږي او له بلې خوا به د تاوتریخوالي په کابو کولو کې اغېزناک تمام شوی وي.