د روسيې دفاع وزير سرګي شويګو ويلي چې روسيه له پنټاګون سره ښو اړيکو ته تياره ده خو خبرداری يې ورکړ چې واشنګټن ځان ځواکمن ګڼي او له خپل دې مقامه له روسيې څخه د همکاري تمه لري.

د افغان غږ(آوا) آژانس د خبر له مخې، د روسیې خبري اژانسونو د شويګو له خولې لیکلي: موږ له پنټاګون سره د همکاريو بيرته جاري ساتلو ته چمتو يو خو له روسیې سره له د قوي مقام په توګه د مذاکراتو هڅه به بې ځايه وي. موږ د پنټاګون د مقام د روښانتيا تمه لرو.
شويګو په یوه اعلامیه کې دا خبرې د امریکا د دفاع وزير جيم ماتيس د خبرو په عکس العمل کې کړي.
جيم ماتیس د تيرې چارشنبې په ورځ وويل چې له روسيې سره په اړيکو کې سختۍ ته اړتيا ده.
د شويګو اعلاميه څو ساعته وروسته له هغه راغلې چې ټاکل شوې وه د امريکا د پوځ لوی درستيز جنرال جوزېف ډنفورډ او د روسيې د پوځ لوی درستيز جنرال والري ګيراميسوف د اذربايجان په پلازمېنه باکو کې سره وويني.
شويګو ويلي، مسکو به په باکو کې د غونډې پر مهال له ډنفورډ څخه په دې اړه توضيحات وغواړي.