د لوړو زده کړو په موسسوکې د نيالګيو د ايښودلو کار د لوړو زده کړو د وزيرې له خوا د څو نيالګيو په ايښودلو سره پيل شو .

د افغان غږ(آوا) آژآنس د خبرله مخی، په دغه پروګرام کې چې د لوړو زده کړو وزارت معينان، رييسان او يوشمېر کارکوونکو هم ګډون کړى و؛ د لوړو زده کړو وزيرې ډاکترې فريدې مومند د لوړو زده کړو وزارت، د کابل پولي تخنيک پوهنتون او د شهيد استاد رباني د ښوونې او روزني د پوهنتون په انګړکې د څو نيالګيو د ايښودلو په ترڅ کې وويل چې ښکلي او سمسورچاپيريال د لوړو زده کړو د مرکزونو يوه اړتيا ده او دغه پروګرام يې د پوهنتونونو د چاپيريال د سمسورتيا او د پارکونو د جوړولو لپاره ترلاس لاندې نيولى دى.
دې له محصلانو او استادانو څخه وغوښتل چې د نيالګيو د ايښودلو په پروګرام کې فعاله ونډه واخلي او د خپل ژوندانه د چاپيريال په سمسورتيا کې دې هلې ځلې وکړي.
ټاکل شوې ده په دې پروګرام کې زر نيالګي چې د کرنې وزارت له خوا ورکړ شوي دي؛ کيښودل شي .