د کابل ښار د اوبو رسولو د لومړي نمبر پروژې قرارداد چې شاوخوا ۱۱،۱۴۱ میلیون امریکايي ډالر ارزښت لري نن د ولسمشر محمد اشرف غني په حضور کې لاسلیک شو.
ارګ ماڼی وایي، د کابل ښار د اوبو رسولو لومړي نمبر پروژې قرارداد د افغانستان د اوبو رسونې شرکت او ښاري کانالیزاسیون او ممتاز ګروپ شرکت ترمنځ لاسلیک شو.
د جمهوري ریاست په وینا، د کابل ښار د اوبو رسونې لومړی نمبر پروژه د افغانستان د اوبو رسولو لویه پروژه ګڼل کېږي چې د المان پراختیایي بانک یې تمویل او مدیریت کوي.
پر المان پراختیایي بانک سربېره د امریکا متحدو ایالاتو انکشافي اداره او د فرانسې انکشافي بانک هم د یادې پروژې مالي ملاتړ کوي د دغې پروژې مالي لګښت چې په درې پړاونو کې بشپړېږي شاوخوا ۷۲ میلیون یورو دی.
د پروژې لومړی پړاو چې ممتاز ګروپ شرکت یې ترسره کوي، د ۱۱ میلیون او ۱۴۱زره او ۸۰۸ ډالرو په ارزښت د امریکا متحدو ایالاتو انکشافي ادارې له بودجې تمویلېږي او ټاکل شوې چې په زر ورځوکې بشپړ شي.
ارګ ماڼي زیاتوی، چې د دغې پروژې په بشپړېدو سره به لس زره کورنۍ ۲۴ ساعته د څښلو پاکو اوبوڅخه برخمنې شي.