دخپریدو نیټه :پنجشنبه ۲۱ جدی ۱۳۹۶ ساعت ۱۳:۲۹
د مطلب کود : 156211
۲۰۱۷ کې شل خبریالان او د رسنیو کارکوونکي وژل شوي

د افغانستان د خبریالانو د خوندیتوب کمیټه وايي، ۲۰۱۷ د افغان خبریالانو لپاره خونړی کال وو، چې په کې شل خبریالان او د رسنیو کارکوونکي ووژل شول.

د خبریالانو د خوندیتوب کمیټې رئیس نجیب شریفي د پنجشنبې په ورځ یوې خبري غونډې ته د دغې ادارې د شپږ میاشتني رپوټ د وړاندې کولو پر مهال وویل، په دغه کال کې د خبریالانو د وژنې او پر رسنیزو دفترونو باندې د بریدونو کچه په بې‌ساري ډول لوړه شوې ده.

د دغې کمیټې په رپوټ کې راغلي، چې په ۲۰۱۷ کال کې له خبریالانو سره د تاوتریخوالي د پیښو په کچه ۶۷ فیصده زیاتوالی راغلی دی.

ښاغلي شریفي وویل، کومې شمیرې چې د خبریالانو د خوندیتوب کمیټې ثبت کړي ښيي، چې په ۲۰۱۷ کال کې په مجموعي ډول له خبریالانو سره د تاوتریخوالي ۱۶۹ پيښې ثبت شوي. دغې کمیټې په ۲۰۱۶ کال کې له خبریالانو سره د تاوتریخوالي ۱۰۱ پيښې ثبت کړې وې.

د دغې کمیټې په رپوټ کې راغلي "له دې شمیرې ۲۰ پیښې د خبریالانو او د رسنیو کارکوونکو د وژلو دي، ۶۱ پيښې د ټپي کیدو، ۲۳ پیښې د وهلو ډبلو، ۳۲ پیښې د سپکاوي او ناوړه چلند، ۶ پيښې د اخراجولو، ۱۵ پيښې د ګواښولو او ۱۲ پيښې د نیولو دي".

د رپوټ له مخې ، په ۲۰۱۶ عیسوي کال کې د خبریالانو د وژنې ۱۳ پیښې ثبت شوې وې او په ۲۰۱۷ کال کې د ۲۰ خبریالانو او د رسنیو کارکوونکو په وژل کیدو سره دغه کچه ۵۴ فیصده زیاته شوې ده.

سرچينه : د صدای افغان خبری آژانس( آوا)
https://avapress.com/vdcb80b88rhbs5p.q3ur.html
تبصره پوسټ کړئ
ستاسو نوم
ستاسو دبرېښنا ليک پته