په پلازمیېنه کابل ښار کې د خونړی ځانمرګي برید له امله نن په هېواد کې ملي ماتم اعلان شوی دی.
د افغانستان جمهوري ریاست دفتر یا ارګ ماڼی په یوه بیان کې لیکلي، چې د پلازمېنې کابل په ګډون په ننګرهار او کندهار ولایتونو کې په دې وروستیو کې د افغانستان دښمنانود تروریستي بریدونو او جنایتونو په ترسره کولو سره یو شمېر هېوادوال شهیدان او ټپیان او زموږ کورنۍ د ویر په ټغر کېنولې.
خبرپاڼه زیاتوي، چې د افغانستان اسلامي جمهوري دولت زموږ غمجنو او ویرجنو کورنیو سره د غمشریکۍ او هغوی ته د درناوي په خاطر په ټول هېواد کې ملي ماتم اعلانوي چې له همدې امله به نن (د یوې ورځې لپاره)په هېواد کې او له هېواده بهر په سیاسي نمایندګیو کې د افغانستان بیرغ نیمه ځوړند وي.
د ارګ ماڼی په وینا، د افغانستان اسلامي جمهوري دولت د شهیدانو کورنیو او ټپیانو ته د ښې رسیدګۍ په موخه سبا یوازې په کابل کې عمومي رخصتي اعلانوي.
ارګ ماڼی وایي، د سه شنبې په ورځ به په ټول هېواد کې د وروستیو تروریستي پېښو د شهیدانو روح ته د دعا په خاطر د عظیم الشان قران د ختم مراسم پرځای شي.
د افغانستان د عامې روغتیا وزارت چارواکي وایي، د شنبې د ځانمرګي په پایله کې لږ تر لږه ۹۵ کسان وژل شوي او ۱۹۱ نور ټپیان دي.