د کورنیو چارو وزارت په یو بیان کې ویلي، په دغه عملیات کې، چې د کابل ښار د خاک‌جبار ولسوالۍ د تره‌خیلو دشتې په سیمه کې ترسره شوي، دوه تنه قاچاقبر هم نیول شوي دي.
دغه وزارت د نیول شوو کسانو د هویت په اړه جزئیات نه دي ورکړي او دغه راز، په دې اړه یې هم څه نه دي ویلي، چې دغو کسانو دیرش کیلوګرام هیروئین کوم ځای ته قاچاق کول.
د کورنیو چارو وزارت، مخدره مواد د تروریزم د تمویل مهمه سرچینه بللې او پر وړاندې یې د پریکنده مبارزې په ترسره کولو ټینګار کړی.
د دغه وزارت د معلوماتو له مخې، د مخدره موادو پر ضد د مبارزې پولیسو په روان لمریز کال کې، د افغانستان په مختلفو ولایتونو کې د مخدره موادو د قاچاق په تور ۲۴۶۰ تنه نیولي او عدلي او قضايي بنسټونو ته یې سپارلي دي.
د کورنیو چارو وزارت ویلي، چې پولیسو له دغه شمیر تورنو کسانو څخه ۲۱۴ ټُنه بیلابیل ډوله مخدره مواد ترلاسه کړي دي.