خوښ ديک ۰

د پولیسو ۷۰۰ رنجر موټر په ناقانونه توګه پر چارواکو ویشل شوي

د پولیسو سلګونه رنجر موټر د پولیسو افسرانو، د ولسمشرۍ ماڼۍ، اجراییه ریاست، امنیت شورا او د ملي شورا کار کونکو او سیاسي څیرو په واک کې ورکړل شوي دي.
د پولیسو ۷۰۰ رنجر موټر په ناقانونه توګه پر چارواکو ویشل شوي

زرګونه دولتي موټر چې مرسته کوونکي هیوادونو د افغانستان خلکو ته ورکړي، همدا اوس له پخوانیو دولتي چارواکو او سیاسي څیرو ترپښو لاندې دي.
د یک تلویزیون د موندې پر بنسټ، نږدې اووه سوه د پولیسو موټر چې ډيری یې رنجر دي، په ناقانونه توګه، د ولسمشرۍ ماڼۍ، اجراییه ریاست، ملي امنیت شورا، د وزارتونو کارکوونکو، پارلمان استازو او سیاسي څيرو ترمنځ ویشل شوي دي.

یک تلویزیون د هغو پنځه سوو کسانو نوملړ ترلاسه کړی چې په ناقانونه توګه د پولیسو رنجر موټر کاروي.
دغه نوملړ کې د کورنیو چارو وزارت د لوړپوړو چارواکو نومونه هم شامل دي چې د پولیسو رنجر او زغره وال موټر له ځان سره لیږدوي.
د دغه وزارت ډیری وزیران او معینان حاضر نشول چې په دې تړاو د کمرې مخې ته وضاحت ورکړي، خو په ټیلیفوني اړیکه کې یې وویل چې دا موټر یې د ځان د ساتنې په موخه د ولسمشر په امر ترلاسه کړي دي.
د کورنیو چارو وزارت هم مني چې د یاد وزارت پخواني چارواکي د ولسمشر غني په امر زغره وال او نور موټر ترلاسه کړي دي.

دغه نوملړ کې همداشان، د کورنیو چارو وزارت د لسګونه برحال او احتیاطی جنرالانو نومونه هم شته چې په ناقانونه توګه د پولیسو موټر لیږدوي.
دغه نوملړکې هغه موټر چې د کورنیو چارو وزارت د افسرانو او نورو چارواکو په واک کې دي، د (خارج تشکیل) په موم یاد شوي دي.
پخوا به د دولتي لوړپوړو چارواکو ته د موټرو ویش د ولسمشرۍ ماڼۍ د جلا حکمونو پر بنسټ د کورنیو چارو وزارت چارواکو له خوا ورکول کیدل، خو اوس ویشل شوي موټر د ۳۸۷۴ شمیرې حکم پر بنسټ، بیرته راټولیږي.
د یک تلویزیون دموندنو پر بنسټ، حتا د کورنیو چاور وزارت یوه مرستیال، یو رنجر د خپل کور د موټر چلوونکي لپاره ځانګړی کړی دی.
د کورنیو چارو وزارت وایي د دغه وزارت احتیاطی افسران هم د موټر او روغنیاتو مستحق دي، خو اضافي موټر به له دوی او نورو دولتي چارواکو تر راتلونکي شلو ورځو پورې واخیستل شي.
د ملي شورا یو شمیر استازي هم ناقانونه توګه د پولیسو له رنجر موټر ګټنه کوي.
د کورنیو چارو وزارت وایي د پولیسو څه باندې ۱۷۰رنجر موټر د ملي شورا استازو سره دي، خو یک تلویزیون تر اوسه توانیدلی چې د ملي شورا د څه باندې څلویښتو اوسنیو او پخوانیو استازو نومونو ته لاس رسۍومومي.

دا په داسې حال کې دي چې امریکا، افغان پولیسو ته د رنجر موټرو سپارل درولي دي.
ولسمشر غني امر کړی چې د پولیسو ټول موټر چې په ناقانونه توګه د چارواکو له لوري کارول کیږي، بیرته راټول شي.
د کورنیو چارو وزارت هم وایي چې تر اوسه یې ۲۰۰ رنجر موټر ټول کړي او تر راتلونکي یوې میاشتې به ټول چارواکي له دغو موټر خلاص کړي.
 
پنجشنبه ۲۳ حمل ۱۳۹۷ ساعت ۱۴:۰۶
د مطلب کود: 161711 په کلپبورډ کې د خبر متن کاپی
ستاسو نوم

ستاسو دبرېښنا ليک پته
ستاسو نظر *