د هېواد په جنوب کې سيمه ييز چارواکي وايي، چې د کندهار- اروزګان لويه لاره به په اساسي ډول جوړ شي.

آوا - کابل: د سیمه ییزو چارواکو په وینا، د کندهار له ارغنداب څخه د اروزګان تر دهراوود پورې دغه لویه لاره ۲۱۰ کیلومتره اوږدوالی لری او ټاکل شوې چې د ۱۲۰ میلیونه ډالرو په لګښت جوړ شی.
 
د افغانستان د جنوب لوېديځ زون د پرمختيايي پروژو مسوول انجنير خوشيوال وويل: دغه لويه لاره په پام کې ده چې د څلورو کلونو په موده کې په اساسي ډول او له نړيوالو معيارونو سره برابره جوړه شي.
 
د باختر آژانس د خبر له مخې: د دغه سړک په اوږدو کې په لسګونو پلونه او پلچکونه او همدارنګه د اوبو لارې په پام کې نيول شوې دي.
 
د چارواكو په وينا، د كندهار - اروزګان لويه لار په افغانستان كې يوه له مصروفو ترانسپورتي لارو څخه ده.
 
ويل کيږي چې دغه لويه لاره د مسوولينو د نه پاملرنې او د جګړو او جګړو له امله ويجاړه شوې ده چې له امله يې تګ راتګ ستونزمن کړى دى.