آوا - هرات: د هرات د محبس عمومي مدیر مولوي محمد نبي خلیل وايي چې د کوچني اختر په مناسبت د دغه ولایت له زندان څخه ۲۵۲ بندیان خوشي شوي دي.

 

د هرات د محبس د رييس په وينا، په ٢٥٢ بنديانو کې ٣٩ ښځې او ١٣ ماشومان شامل دي، چې بخښل شوي دي.

 

د هغه په ​​وينا، د ١٧ نورو کسانو د حبس اندازه کمه شوې ده.

 

مولوي خليل يادونه وکړه، چې د هرات له زندان څخه خوشې شوي کسان زياتره هغه کسان دي، چې په سپکو جرمونو بنديان وو او د اختر په مناسبت بخښل شوي وو.

 

دغه راز د غور د استيناف محکمې عمومي رييس شيخ مولوي عبدالکريم صميم وايي، چې د غور له ولايتي زندان څخه ٥٠ تنه بنديان خوشې شوي، چې ٤١ نارينه او ٩ يې ښځې دي.

 

له بلې خوا د نيمروز د محاکمو مطبوعاتي مسوول مولوي سخي احمد جلالي هم وايي چې د کوچني اختر په مناسبت د دغه ولايت له مرکزي زندان څخه ٩٥ تنه بنديان او ٥٩ تنه نور د بند په موده کې خوشي شوي دي.

 

په همدې حال کې د فراه ولايت د استيناف محکمې رييس مولوي محمد ګل صياد وايي، چې د هغو ١١٦ تنو له ډلې څخه چې د خوشې کېدو په حال کې دي، له دې جملې څخه ٩٢ تنه هغه بنديان دي چې په بېلابېلو سيمو کې د نشه يي توکو د پېر او پلور په جرم نيول شوي وو. 

 

ښاغلي صیاد زیاته کړه: په دې سره به یو شمېر نور هغه بندیان چې نور جنایي جرمونه هم ولري، خوشي شي.

 

د یادولو وړ ده چې د کوچني اختر په مناسبت د اسلامي امارت د مشر ملا هبت الله اخندزاده په حکم د ټول هیواد له زندانونو څخه ۲۸۵۵ تنه خوشي شوي دي.