د افغانستان او قزاقستان د سوداګرۍ خونه په هرات ولایت کې د دواړو هېوادونو ترمنځ د سوداګرۍ د اسانتیا او زیاتوالي په موخه پرانیستل شوه.

آوا: د افغانستان-قزاقستان د سوداګرۍ خونه د هرات د مرستیال والي مولوي حیات الله مهاجر فراهي او د قزاقستان د سفیر او د دغه هېواد د سوداګرۍ خونې د رئیس علیم‌خان یسین گلدیف له خوا پرانیستل شوه. 

د چارواکو په وینا دغه خونه د دواړو هېوادونو ترمنځ د سوداګرۍ د اسانتیا او زیاتوالي په موخه جوړه شوې ده.

مخکې له دې د صنایعو او سوداګرۍ وزارت سرپرست په افغانستان کې د قزاقستان د سوداګرۍ د نړیوالې خونې له استازي سره په افغانستان کې د قزاقستان د سوداګرۍ د نړیوالې خونې د جوړیدو او په مقابل کې د قزاقستان د مشهورو شرکتونو د معرفي کولو په اړه خبرې وکړې. په دې کتنه کې د دواړو هېوادونو ترمنځ د سوداګریزو ویزو په صادرولو کې د پرتو خنډونو د لرې کولو په اړه د لازمو دوه اړخیزو ترانزیتي اسانتیاوو په اړه خبرې وشوې.

باید وویل شي، چې قزاقستان یو له هغو هېوادونو څخه دی، چې له افغانستان سره ښې سوداګریزې او اقتصادي همکارۍ لري.