د اسلامي امارت د پوهنې وزارت وايي چې په اروپا کې میشتو افغان علمي شخصیتونو د افغانستان د پوهنې د وضعیت د ښه والي په موخه خپل وړاندیزونه د پوهنې وزارت له مشرتابه سره شریک کړي دي.

آوا - کابل: د پوهنې وزارت مطبوعاتي دفتر د یوې خبرپاڼې په خپرولو سره ویلي چې په اروپا کې مېشتو یو شمېر افغان علمي او فرهنګي شخصیتونو د دغه وزارت له سرپرست مولوي حبیب الله اغا سره وکتل.

مولوي حبیب الله اغا د پوهنې په برخه کې د دغه وزارت د لاسته راوړنو او فعالیتونو په اړه خبرې وکړې.

له بلې خوا په اروپا کې مېشتو افغان علمي او فرهنګي شخصیتونو د دغه وزارت له پرمختګونو او هېوادوالو ته د دیني او معاصرو علومو په برخه کې د زده کړو د اسانتیاوو په برابرولو خوښي څرګنده کړه.

دوی د پوهنې د وضعیت د ښه والي په اړه خپل نظریات او وړاندیزونه د پوهنې وزارت له مشرتابه سره شریک کړل.