حامد کرزي د محرم الحرام د میاشتې د عاشورا په ورځ د بریدونو تر سره کول د هغو کسانو کار وباله چې د اسلام او افغانستان دښمنان دي او نه غواړي چې تر اسلامي چتر لاندې مسلمانان په اتحاد او آرامۍ کې ژوند وکړي.

د افغانستان د اسلامي جمهوریت جمهور رئیس حامد کرزي هغه تروریستي بریدونه په کلکه وغندل چې په کابل او مزار کې زموږ د یو شمېر بې ګناه هېوادوالو د مرګ ژوبلې سبب شول.

د لومړنیو رپوټونو له مخې نن له غرمې مخکې د افغانستان دښمنانو د کابل او مزارشریف په ښارونو کې دوه تروریستي بریدونه ترسره کړل چې له امله یې زموږ یو شمېر بې ګناه هېوادوال چې د عاشورا د مذهبي مراسمو په تر سره کولو بوخت وو شهیدان او ټپیان شول.

د افغانستان د اسلامي جمهوریت جمهور رئیس حامد کرزی په داسې حال کې چې د بُن په کنفرانس کې له ګډون وروسته د آلمان په هېواد کې په رسمي سفر بوخت دی، ددغه خبر په اورېدو خواشینی شو، او دغه تروریستي بریدونه یې په کلکه وغندل.

حامد کرزي د محرم الحرام د میاشتې د عاشورا په ورځ د بریدونو تر سره کول د هغو کسانو کار وباله چې د اسلام او افغانستان دښمنان دي او نه غواړي چې تر اسلامي چتر لاندې مسلمانان په اتحاد او آرامۍ کې ژوند وکړي.

جمهور رئیس زیاته کړه چې د افغانستان په تاریخ کې د ټولو مذهبونو پیروان تل د ورورګلوۍ په فضا کې اوسیدلي دي او دا لومړی ځل دی چې په مذهبي مراسمو کې داسې غم لړلې پېښې رامنځته کیږي چې له شک پرته دا د افغانانو د اتحاد او اتفاق ددښمنانو کار دی، خو هغوی دې په دې پوه شي چې په دا ډول کرغېړنو عملونو سره به د افغانانو په یووالي کې خلل رامنځ ته نشي، بلکې د خپلو دښمنانو پر وړاندې به ددې هېواد د خلکو کرکه او نفرت لازیات شي.

د افغانستان د اسلامي جمهوريت جمهور رئيس حامد كرزی د دغو بریدونو د قربانيانو كورنيو ته د خپلې ژورې خواخوږۍ او ډاډګیرنې مراتب وړاندې کوي، شهیدانو ته جنت فردوس او ټپیانو ته د لوی خدای له دربار څخه د سملاسي روغتیا هیله کوي