د افغانستان او پاکستان د کرکټ تر ۱۹ کلونو کشر لوبغاړي نن مخامخېږي

تاند- د افغانستان او پاکستان د کرکټ تر نولس کلونو کشر لوبډلې نن په یو ورځینۍ نړیواله سیالۍ کې مخامخ کېږي.
د افغانستان کرکټ بورډ پرون وویل چې د افغانستان او پاکستان د نولس کلنو ټیمونو د مسابقو په دې لړۍ کې درې یو ورځینۍ سیالۍ شاملې دي چې لومړۍ یې د اکتوبر په ۲۸ مه یعني نن پیلېږي.
د کرکټ بورډ د سرچینو پر اساس دا مسابقې د پاکستان د پنجاب ایالت په مرکز لاهور کې کېږي.
لومړنۍ مسابقه به د افغانستان په وخت د سهار په نهه بجې پیل شي. دوهمه سیالي د اکتوبر په نهه ویشتمه یعني د چهارشنبې په ورځ په پام کې نیول شوې ده او وروستۍ سیالي به د جمعې په ورځ (اکتوبر۳۱مه) وي.
تر دې مخکې د افغانستان او پاکستان د کرکټ د ۱۹ کلونو لوبغاړو ترمنځ وروستۍ مسابقه هم سږ کال په لاهور کې شوې وه.
په تېرو سیالیو کې دوې پاکستان او یوه افغانستان ګټلې وه.
د افغانستان تر ملي ټیم د نولس کلنو ټیم ښه ځلېږي او تر نولس کلنو شپاړس کلن لا ښه برېښي. دا مسله د افغانستان د کرکټ راتلونکي ته هیلې لا زیاتې غوړوي.
د افغانستان د کرکټ د شپاړس کلنو ټیم، اوس په قطر کې دی او په روانو اسیايي سیالیو کې خپل سیالان یو په بل پسې ماتوي.