گزارش‌ها می‌رسانند که مسکو و دوشنبه در مرز مشترک تاجیکستان با افغانستان تجهیزات سنگین و پیش‌رفتۀ نظامی را جابه‌جا کرده‌اند.

به گزارش مانیتورینگ خبرگزاری آوا، مقام‌های روسی به رسانه‌های محلی آن کشور گفته‌اند، روسیه روز گذشته شماری از سلاح‌های پیش‌رفتۀ سنگین را به تاجیکستان سپرده تا در مرز مشترک با افغانستان جابه‌جا گردند.

الکساندر کشیموسکی، یکی از مقام‌های ارشد ارتش روسیه گفته‌است روسیه به خاطر تهدید تروریستان از افغانستان و تامین امنیت مرزها، این سلاح‌ها را به تاجیکستان سپرده‌است.

او گفته‌است که سلاح‌های سپرده‌شده به تاجیکستان شامل تانک‌های T-۷۲B۱، موترهای زرهی BTR-۸۰ و BTR-۷۰، موترهای زرهی BMP-۲، هلیکوپترهای Mi-۲۴ و Mi-۸، توپ‌های D-۳۰، سلاح ضد هواپیما و تجهیزات بررسی و مخابراتی هستند.

این در حالی‌ست که روسیه زمانی که تازه سروصدای موجودیت گروه داعش در افغانستان ایجاد شده بود نیز نیروهایش را که از تاجیکستان خارج ساخته بود، به مرزهای این کشور با افغانستان برگردانید.

از سویی، روسیه تا به حال بارها از موجودیت گروه داعش در افغانستان و نفوذ آن به کشورهای آسیای میانه اظهار نگرانی کرده‌است.