(افغان غږ آژانس (آوا 9 اسد 1401 ساعت 11:23 https://www.avapress.com/ps/news/256372/په-بلخ-کې-یوې-ترافیکي-پېښې-۱۴-تنو-ته-مرګ-ژوبله-اړولې-ده -------------------------------------------------- سرليک : په بلخ کې یوې ترافیکي پېښې ۱۴ تنو ته مرګ ژوبله اړولې ده -------------------------------------------------- د بلخ سیمه ییز چارواکي وايي، د بلخ ولایت د مزار شریف پر لویه لاره د دوو موټرو د ټکر له امله ۴ تنه وژل شوي او ۱۰ نور ټپیان دي. متن - منځ : آوا، محمد اصف وزیري؛ د بلخ د امنیه قومندانۍ ویاند، آوا ته وویل، چې دا پېښه د شنبې په ورځ (د اسد ۸مه) مازدیګر ۴:۲۰ بجې د بلخ ولایت د شولګره ولسوالۍ او مزارشریف پر لویه لاره رامنځ ته شوې ده.   د هغه په ​​وينا، په وژل شويو او ټپيانو کې ښځې او ماشومان هم شامل دي.   وزيري زياته کړه، دغه پېښه هغه مهال رامنځته شوه، چې د حاجيانو يو موټر چې له حج څخه د سرپل ولايت پر لور روان و، د ګوسفندي ولسوالۍ په مربوطاتو کې له يوه تونس موټر سره ټکر وکړ.   په همدې حال کې معراج الدین فاروقي؛ په مزارشريف كې د ابو علي سينا ​​د حوزوي روغتون سرطبيب آوا ته وويل: د مزارشريف- شولګره په لويه لار د ترافيكي پېښې له كبله ۱۱ ټپيان روغتون ته لېږدول شوي چې د ډېرو روغتيايي حالت د اندېښنې وړ دى.   هغه زياته کړه، چې په ټپيانو کې ٥ ښځې، څلور ماشومان او دوه نارينه دي، چې روغتون ته لېږدول شوي دي.   دا په داسې حال کې ده، چې د حاجيانو له راستنېدو او پر سړکونو د ترافيکي ګڼې ګوڼې په ډېرېدو سره په دې وروستيو ورځو کې په هېواد کې ترافيکي پېښې زياتې شوې دي.   سید پیرآغا؛ د اسلامي امارت د چټک غبرګون قطعې قومندان هم په غزني ولایت کې له حج څخه د راستنیدو پر مهال په ترافیکي پیښه کې شهید شو.