(افغان غږ آژانس (آوا 30 جدی 1398 ساعت 19:56 https://www.avapress.com/ps/news/201328/سليم-شاهين-د-سایبري-باج-اخيستنې-په-تور-دوه-کلن-بند-محکوم-شوی -------------------------------------------------- سرليک : سليم شاهين د «سایبري باج» اخيستنې په تور په دوه کلن بند محکوم شوی -------------------------------------------------- د افغانستان لوېې څارنوالۍ ويلي چې ممثل او فلم جوړونکی سليم شاهين یې له يوې ښځې څخه د «سايبري باج اخيستنې» په تور د دوو کالو بند په سزا محکوم کړی دی. نوموړي دغه ښځه گواښلې وه چې که پېسې ور نه کړي ويديو به یې خپره کړي. متن - منځ : د افغانستان د لوېې څارنوالۍ وياند جمشيد رسولي د دوشنبې په ورځ (د ۲۰۲۰ م کال د جنورۍ ۲۰ نیټه) د آلمان خبري آژانس دي پي اې ته ويلي دي چې سليم شاهين له يوې نجلۍ څخه د ۱۵۰ زره افغانيو غوښتنه کړې وه. د نوموړي په خبره شاهين دا نجلۍ گواښلې وه که چې دغه پېسې ور نه کړي، د هغې ويديو به چې د يوه محفل په ترڅ کې یې اخيستې وه، خپره کړي. د لویې څارنوالۍ وياند وويل چې د دې ويديو محتوا داسې څه نه لرل چې د افغانستان د قوانينو له مخې جرم او يا غیر اخلاقي وي. هغه وويل چې سليم شاهين د دې نجلۍ څخه د پيسو د اخيستو پر وخت ځای پر ځای نیول شوی وو. سليم شاهين په افغانستان کې د گژدم سياه او خاک په څېر فلمونو له کبله پيژندل کیږي. نوموړي په يوه مرکه کې د لږ تر لږه ۱۲۰ فلمونو د جوړولو ادعا کړې وه. په دې وروستيو کې هغه د چای خانه او نان و پياز په نوم تلويزيوني خپرونې پر مخ وړلې. د څارنوالۍ له خوا ويل شوي چې شاهين په لومړۍ محکمه کې په دريو کالو بند محکوم شوی وو خو د استيناف محکمې یې د بند موده دوو کالو ته راکمه کړې ده.