(افغان غږ آژانس (آوا 5 میزان 1401 ساعت 13:07 https://www.avapress.com/ps/news/259075/د-پنجشېر-او-تخار-نويو-واليانو-معرفي-له-ظلم-استبداد-څخه-په-پاتې-کېدو-ټينګار -------------------------------------------------- سرليک : د پنجشېر او تخار د نويو واليانو معرفي او له ظلم او استبداد څخه په پاتې کېدو ټينګار -------------------------------------------------- د اسلامي امارت د رهبرۍ له لوري د پنجشېر او تخار د نويو واليانو تر معرفي کېدو وروسته دغه نوي چارواکي د دولتي چارواکو له خوا د يادو ولايتونو د ملکي او نظامي ادارو مسوولينو ته ور وپېژندل شول او په کار يې پيل وکړ. متن - منځ : آوا - کابل: د کورنیو چارو وزارت پخوانی مرستیال محمد محسن هاشمي د پنجشیر د والي په توګه او د قطر د سیاسي دفتر پخواني غړي مولوي ضیاءالدین مدني د تخار د والي په توګه په کار پیل کړی دی. په همدې حال کې د پنجشیر پخوانی والي ملا محمد شعیب د لوګر د والي په توګه معرفي شوی دی.   د باختر آژانس دخبرله مخې ؛ د پنجشیر او تخار د نویو والیانو د لوړې په مناسبت جوړې شوې غونډې کې د اسلامي امارت لوړ پوړو چارواکو، پخوانیو واليانو او د هغو ولایتونو یو شمیر ملکي او نظامي چارواکو ګډون کړی وو.   د پنجشېر پخواني والي د دغه ولايت د نوي والي د ټاکل کېدو مبارکي وويله او زياته يې کړه چې د قرانکريم د مبارکو آيتونو پر بنسټ په نېکو کارونو او د ثواب په لاره کې له يو بل سره مرسته او همکاري ضروري ده. له هغې لارې چې د اسلامي شريعت خلاف وي، هغه ظلم او استبداد دی، راځئ چې لرې پاتې شو.   دغه راز د تخار نوي والي مولوي ضياءالرحمن مدني وويل، چې د تېر حکومت مشران د شهيدانو له ايډيالونو سره د خيانت او د نفس په خواهشاتو کې د ډوبېدو او د دولتي چارواکو د بې عزتۍ له امله ذليل شوي دي. اسلامي امارت باید د دوی له ناوړه کړنو څخه عبرت واخلي او د نفس د ناروا غوښتنو په مقابل کې جهاد وکړي او د نړۍ د خلکو په وړاندې ټینګ ودریږي.   په دې کتنه کې د اسلامي امارت د لوړ پوړو چارواکو د تقرر او تبادلې، د پنجشیر او تخار ولایتونو د ستونزو او ننګونو په اړه خبرې وشوې.   پنجشیر او تخار ولایتونه له بغلان او بدخشان ولایتونو سره یوځای هغه ولایتونه دي چې د اوسني حکومت پر وړاندې په خپلو غرنیو او ستونزمنو سیمو کې د مقاومت د جبهې تر نامه لاندې یو شمېر مخالفین لا هم روان دي او د نويو ټاکنو په ترسره کولو سره د واليانو په خبره، هيله ده چې په دې ولايتونو کې د پخوا په پرتله شخړې او ستونزې کمې شي او د سيمه ييزو حکومتونو له کړنو څخه د خلکو د امنيت او رضايت کچه ​​زياته شي.