(افغان غږ آژانس (آوا 15 اسد 1401 ساعت 10:27 https://www.avapress.com/ps/news/256713/د-ملګرو-ملتونو-ځانګړي-استازي-کابل-په-لوېديځ-کې-بريد-عاملينو-محاکمې-غوښتنه-وکړه -------------------------------------------------- سرليک : د ملګرو ملتونو ځانګړي استازي د کابل په لوېديځ کې بريد د عاملينو د محاکمې غوښتنه وکړه -------------------------------------------------- د افغانستان په چارو کې د ملګرو ملتونو ځانګړي استازي پرون د یو لړ ټویټونو په خپرولو سره اسلامي امارت د هیواد د اتباعو د امنیت د تامینولو مسئول بللی او د دغه برید د عاملینو د پیژندلو او محاکمې غوښتنه یې کړې ده. متن - منځ : آوا: د افغانستان په چارو کې د ملګرو ملتونو ځانګړي استازي ریچارډ بینیټ پرون (جمعه د اسد ۱۴مه) په یوه ټویټ کې ویلي:«د افغانستان په لویدیځ کې د هزاره ګانو له ګڼې ګوڼې په یوه بازار کې پر ملکي وګړو وحشیانه برید په کابل د هغو جنایتونو دوام دی چې داعش یې مسئولیت په غاړه اخیستی دی.   بینیټ د قربانیانو له کورنیو سره د خواخوږۍ له څرګندولو وروسته د اسلامي امارت مسئولین د ټولو افغانانو د ساتنې مسئول وبلل او ویې ویل چې د دغه ډول جنایتونو عاملین باید محاکمه شي.   د ملګرو ملتونو ځانګړي استازي یو ځل بیا د افغانستان په چارو کې د ملګرو ملتونو د سرمنشي د ځانګړي استازي له مرستیال ډاکټر رمیز الکباروف څخه غوښتي چې د دغه ناوړه برید د عاملینو په اړه له نړیوالو معیارونو سره سم هر اړخیزه او شفافه څېړنه وکړي.   دا په داسې حال کې ده، چې د ملګرو ملتونو چارواکو په تېرو وختونو کې هم څو ځلې د کابل په لوېدیځ کې ورته بریدونه غندلي، خو د دغه ډول بریدونو د له منځه وړلو یا کمولو لپاره یې کومه عملي حل لاره نه ده وړاندې کړې.   د یادولو وړ ده چې د کابل په لویدیځ کې د سرکاریز په سیمه کې د پرونۍ چاودنې په پایله کې چې مسئولیت یې داعش ترهګرې ډلې منلی وو، ۸ تنه هیوادوال شهیدان او ۱۸ تنه نور ټپیان شوي وو.   د عیني شاهدانو د څرګندونو پر بنسټ، دغه چاودنه د یوه ګاډي کي د ځای پر ځای شوي مقناطیسي ماین د چاودنې له امله رامنځته شوې ده.