د نیپال د بهرنیو چارو وزیر وايي د پاکستان او هند مشرانو د غني په غوښتنه روغبړ وکړ

تاند- د نیپال د بهرنیو چارو وزیر وايي چې د سارک یا د جنوبي اسیا د همکارۍ ټولنې په وروستۍ سرمشریزه کې د افغانستان ولسمشر اشرف غني مهم رول ولوباوه چې د هند او پاکستان صدراعظمان یو بل ته لاسونه ورکړي او روغبرړ وکړي.
د نیپال د بهرنیو چارو وزیر ماهیرندرا بهادر پاندي پرون /یکشنبه/ وویل:«نیپال هڅه کوله چې نه یوازې د هند او پاکستان صدراعظمان نندرا مودي او نوازشریف یو بل ته لاسونه ورکړي، بلکې دا هڅه یې هم کوله چې د دواړو مشرانو نظرونه سره نژدې کړي.»
ده همداراز وویل:«د سارک مشرانو ته تر سرمشریزې مخکې د بلنلیکونو د سپارلو په مهال ما هڅه وکړه چې په غونډه کې د دوی د ګډون ژمنه ترلاسه کړم، په خپله مې د سارک د غړیو هیوادونو له بهرنیو چارو وزیرانو، دولتمشرانو او ولسمشرانو سره ولیدل او دوی ته مې په کلکه وویل چې د اعتماد د چاپېریال، او پوهاوي د رامنځته کولو او د سارک د غړیو ترمنځ د اړیکو د ښه کولو اړتیا ده څو دا سیمه ییزه ټولنه لا زیاته اغېزمنه شي.»
د نیپال د بهرنیو چارو وزیر د خپلو خبرو په دوام کې وویل:«په پلازمېنه کتمندو کې د سارک د غړیو هیوادونو د مشرانو د غونډې په ترڅ کې ما د غړیو ترمنځ د دوه اړخیزو ستونزو د حل کولو پر ضرورت ټینګار وکړ. خو د هند او پاکستان د مشرانو د نژدې کولو لپاره د نیپال له هلوځلو سره سره د هند او پاکستان مشرانو یو بل ته لاسونه نه ورکول مګر دا چې د افغانستان ولسمشر اشرف غني مهم رول ولوباوه او نندرا مودي او محمد نوازشریف یې له یو بل سره روغبړ ته وهڅولی شول.
د نيپال د بهرنیو چارو وزیر همداراز وویل:«غني د ډېرې لوړې سویې عالم مشر دی او د داسي څه کولو وړتیا لري. همدا علت دی چې وایم نیپال د دوو مشرانو ترمنځ د روغبړ کولو ابتکار وکړ، خو په دې نوښت کې د سارک مشرانو برخه واخیسته.»
د سارک د دوه ورځینۍ سرمشریزې کوربه هیواد نیپال دوه ځلي هڅه وکړه چې نوازشریف او نندرا مودي یو بل ته لاسونه ورکړي خو بریالی نه شو. خو د اشرف غني په غوښتنه مودي او شریف له ضده تېر شول او له یو بل سره یې په لاس روغبړ وکړ.