خوښ ديک ۰

په جنوري میاشت کې د افغانستان، پاکستان، امریکا متحده ایالاتو او چین د هېوادونو تر منځ لومړنۍ څلور اړخیزه ناسته جوړه شي

په جنوري میاشت کې د افغانستان، پاکستان، امریکا متحده ایالاتو او چین د هېوادونو تر منځ لومړنۍ څلور اړخیزه ناسته جوړه شي
 د افغانستان د اسلامي جمهوریت جمهور رئیس او اجرائیه رئیس د پاکستان له لوی درستیز جنرال راحیل شریف او ورسره پلاوي سره کتنه او خبرې وکړې. په دې کتنه کې د امنیتي مسایلو، له ترهګري سره د ګډې مبارزې، د سولې پروسې د پیل او د معلوماتو د تبادلې په هکله بحث او خبرې وشوې.

په دې کتنه کې د دواړو هېوادونو له خاورې څخه د ترهګرو د ازادانه فعالیتونو د مخنیوي په موثرو لارو چارو ټینګار وشو او د دواړو هېوادونو د خلکو تر منځ د تګ راتګ، په پاکستان کې د افغان کډوالو او قومونو د اړیکو د اړتیاو درک او درناوي ته په پام توافق وشو، چې دواړه هېوادونه دې اجازه نه ورکوي، چې ترهګر یې له خاورې څخه د ترهګریزو اعمالو او تاوتریخوالي د ترسره کولو لپاره ګټه واخلي.

همدارنګه دواړو لوریو موافقه وکړه، چې د طالبانو له هغو ډلو سره به د سولې او خبرو بهیر ته، چې مذاکرې او پخلاینې ته تیار دي ادامه ورکړي او هغه ډلې چې ترهګریزو فعالیتونو او تاوتریخوالي ته ادامه ورکوي له هغوی سره به د هغه چوکات له مخې چلند وشي، چې دواړه لوري پرې توافق وکړي.

په دې کتنه کې دواړو لوریو توافق وکړ، چې سولې ته د رسېدو لپاره به د موجود څلور اړخیز چوکاټ له مخې د ګډو مسوولیتونو په درک کولو سره د افغانستان د حکومت په رهبري د سولې د بهیر ملاتړ وکړي.

دواړو لوریو موافقه وکړه، چې سولې ته د رسېدو په خاطر دې د غونډې د ګډونوالو د مشخصو مسوولیتونو په قید سره د یوې جامع لارې د نقشې د تدوین لپاره د ۲۰۱۶ کال په جنوري میاشت کې د افغانستان، پاکستان، امریکا متحده ایالاتو او چین د هېوادونو تر منځ لومړنۍ څلور اړخیزه ناسته جوړه شي.

همدارنګه دواړو لوریو د اړیکو په ښه والي او باور جوړولو زیات ټینګار وکړ، تر څو له ګډو تهدیدونو سره د مقابلې او ښې همغږۍ لپاره دوه اړخیزې امنیتي غونډې زیاتې شي.

په دې کتنه کې د افغانستان د بهرنیو چارو وزیر، د ملي دفاع وزارت سرپرست، د ملي امنیت شورا سلاکار، د ملي امنیت د عمومي ریاست سرپرست، د هېواد لوی درستیز او ځینو نورو لوړ پوړو مقاماتو حضور درلود.
سرچينه : د صدای افغان خبری آژانس(آوا)
دوشنبه ۷ جدی ۱۳۹۴ ساعت ۱۰:۰۳
د مطلب کود: 120732 په کلپبورډ کې د خبر متن کاپی
ستاسو نوم

ستاسو دبرېښنا ليک پته
ستاسو نظر *