د افغانستان د فري فایټ اتل، باز محمد مبارز نن( دوشنبه) د خپل روسي سیال سره د سیالۍ لپاره مسکو ته لاړ.
تمه ده چې ښاغلي مبارز د روان میلادي میاشتې په اتمه د روسیې مسکو ښار کې د خپل ځواکمن سیال مکسیم کتکوف سره سیالۍ وکړي.
یک ټلویزیون د دغې سیالۍ د ژوندۍ خپورولو مسوولیت په غاړه لري.
مبارز د روسي اتلانو په ګونډو کولو تجربه لري؛ خو هغه ویلي چې دا ځل به په یوې نوې طریقې سره د سیالۍ ډګر ته راووځي.
د ښاغلي مبارز روزونکی عبدالواسع قیومي ویلي چې هغه له یوې میاشتې راهیسې د کورنیو او بهرنیو روزونکو له لورې تمرین لیدلی.
د هغه په وینا، ښاغلي مبارز د تایلند په پوکت ښار کې د نړۍ له پیاوړو مبارزانو سره دوستانه لوبې کړي او د مې میاشتې د اتمې لپاره ښه چمتووالی لري.
باز محمد مبارز د افغانستان د سپورټ نړۍ له ځلاندو ستورو دی چې په نړیواله کچه لاسته راوړنې لري.
د هیواد دغه اتل په دې وروستیو کې د ولسمشر غني او ځینې نورو بنسټونو له لورې په عالي مډالونو و نازول شو.
تیر میلادي کال مبارز د نړۍ د ځواکمنو ازادو مبارزانو( فري فایټرانو) کې ځای پيداکړ او وروسته وتوانید چې له دې درې کسانو څخه لومړی مقام ترلاسه کړي.
هغه دغه مقام یې د رای ګیرۍ پر اساس د" ای سي بي" له بنسټ څخه لاسته راوړ چې په دغه رای ګیرۍ کې د نړۍ ۳۰ مخور ورزشکاران د فري فایټ په برخه کې د ۴۵۰ کسانو نه ټاکل شوي وو او له هغوی څخه درې کسان د رای ګیرۍ ته وړاندې شول.