جمهوررئیس غني د هېواد له یو شمېر سیاسي، ملي او جهادي شخصیتونو سره مشورتي ناسته وکړه

په دغه ناسته کې چې په ارګ کې وشوه، پر بېلابېلو موضوعاتو په ځانګړي ډول ګاونډیو هېوادونو سره د ملي ګټو په چوکاټ کې د اړیکو په ټينګېدو، د سیمه‌ییز ثبات پر ټينګښت او په افغانستان او سیمه کې د امنیت په پراخولو ژور بحث او خبرې وشوې.
همدارنګه په دغه ناسته کې ګډونوالو په یادو موضوعاتو د بحث پر مهال خپل هر اړخیز او ژور نظریات شریک کړل او له ګاونډیو هېوادونو سره یې د افغانستان پر اړیکو د ټینګار تر څنګ دا موضوع د ځانګړي اهمیت وړ وبلله او د دغه ډول ناستو دوام یې وغوښت.
په دغه ناسته کې د جمهوري ریاست دویم مرستیال محمدسرور دانش، اجرائیه رئیس ډاکټر عبدالله عبدالله، پخواني جمهوررئیس حامدکرزي، د سولې د عالي شورا رئیس پيرسیداحمد ګیلاني، استاد عبدرب الرسول سیاف، قاضي القضات او د سترې محکمې رئیس محمد یوسف حلیم، د ولسي جرګې رئیس عبدالرووف ابراهیمي، د مشرانو جرګې رئیس فضل هادي مسلمیار، د اجرائیه ریاست معاونینو انجنیر محمدخان او استاد محمد محقق، محمد یونس قانوني، د سولې عالي شورا ستر مرستیال استاد محمدکریم خلیلي، د ملي امنیت سلاکار محمدحنیف اتمر، هدایت‌امین ارسلا، محمداسماعیل خان، په عامه اړیکو او سټراټيژیکو چارو کې د جمهوررئیس ستر سلاکار احمدنادر نادري او په سیاسي چارو کې د جمهوررئیس ځانګړي استازي ډاکټر محمداکرم خپلواک هم حضور درلود.
ارګ-ریاست جمهوری