افغان ولسمشر محمد اشرف غني تیره ورځ د ماتې نه منونکو لوبو د مشال بلولو په مراسمو کې چې نن مازدیګر په ارګ کې ترسره شول ګډون او وینا وکړه.
ارګ ماڼی د ولسمشر غني له حواله په یوه بیان کې لیکلي، چې د افغانستان امنیت او ثبات د ټولې نړۍ له امنیت او ثبات سره تړلې او موږ د دې ازادۍ او امنیت خوندیتابه څخه د دفاع په خاطر په لومړۍ کرښه کې یوو.
هغه زیاته کړه زموږ د ټولو درد یو دی، خو هغه معلولیت لرونکي سرتېري چې په افغانستان کې یې له نړیوالو تروریستانو سره د جګړې په ډګر کې قربانۍ ورکړي اتلان دي.
نوموړې وویل، موږ د جګړې لامل نه یوو، بلکې دغه جګړه پر موږ تپل شوې ده.
هغه زیاته کړه، زه د کاناډا د حکومت، خلکو، کاناډایي سرتېرو او ټولو نړیوالو همکارانو د زړورتیا، مېړانې، مشارکت او قربانیو قدرداني کوم او د دوی مشارکت د دې ښکارندویي کوي چې موږ ټول یوځای یوو.
وروسته د نه ماتېدونکو لوبو اجرائیوي رئیس مایکل بورنز له جمهوررئیس غني او ټولو ګډونوالو څخه د مننې ترڅنګ د کاناډا په ټورنټو ښار کې د یادو لوبو په اړه خبرې وکړې وې ویل: له ۵۰ ورځو څخه په کمه موده کې به د کاناډا ټورنټو ښار د دریم ځل لپاره د ماتې نه منونکو لوبو کوربه وي. هغه زیاته کړه د سږ کال په دغو لوبو کې به د افغانستان په شمول له ۱۷ هېوادونو څخه ۵۵۰ تنه ګډون وکړي.
په افغانستان کې د غوڅ ملاتړ ماموریت عمومي قومندان جنرال نیکولسن له جمهوررئیس غني، جنرالانو، سفیرانو او غوڅ ملاتړ له استازو او ټولو نړیوالو دوستانو چې د افغانستان د امنیت په تامین کې یې ونډه اخیستې مننه وکړه، وې ویل څو اوونۍ وړاندې مو د دې لوبو یوه ازمایښتي دوره ترسره کړه، څو یو پیاوړی افغان ټیم پکې برخه واخلي.
جنرال نیکولسن د غوڅ ملاتړ سرتېرو مېړانې ته په اشارې وویل، ستاسې مېړانه د ستایلو ده، ځکه چې تاسې د جګړې په ډګر کې ماته ونه منله او په نورو ډګرونو کې به هم مات نه شئ، افغان امنيتي او دفاعي ځواکونه له تاسې سره اوږه په اوږه ولاړ دي.