د افغانستان ولسمشر محمد اشرف غني وایي په پام کې ده چې امریکا متحده ایالاتو افغان امنیتي او دفاعې ځواکونو ته په راتلونکې دوه اونیو کې شپږ نوې هلیکوبترې ورکړي.
د صدای افغان خبری آژانس(افغان غږ خبری آژانس) ولسمشر غني دغه څرګندونې تیره ورځ په پکتیا ولایت کې له دفاعي او حکومتي چارواکو سره د کتنې پر مهال وکړه.
هغه زیاته کړه «امریکا متحده ایالات به په راتلونکو دوه اونیو کې ۶ هلیکوپترې د افغانستان امنیتي او دفاعي ځواکونو ته ورکړي.»
د لسمشر غني په وینا، د قول اردوګانو صلاحیت زیات شوی دی خو د امریکا له خوا د نوې هلیکوپترو د ورکولو په اړه نور جزئیات ور نه کړل.
په افغانستان کې د ناټو غوڅ ملاتړ ماموریت تیره میاشت وویل، د افغان هوایي ځواکونو لپاره لومړی څلور UH-60 ډوله یا بلک هاک پرمختللې چورلکې لیږدولو ته اماده شوي.
د ناټو غوڅ ملاتړ ماموریت په وینا، د دغو څلور چورلکو وروستی تخنیکي ازموینې پایلې ته رسېدلي او په پام کې ده چې د سپتمبر په میاشت کې افغانستان ته واستول شي.
دا په داسې حال کې ده چې افغان حکومت او د افغانستان متحدین د افغان امنیتي ځواکونو او په خاصه توګه هوایي ځواکونو د پیاوړي کولو لپاره یې هڅې پیل کړي دي.
د امریکا متحده ایالاتو دفاع وزارت یا پنټاګان کابو دوه میاشتې مخکې ویلي وو، په پام کې ده چې د افغانستان د هوایي ځواکونو د الوتکو شمېر تر ۲۰۲۳ میلادي کال پورې دوه برابره شي.
د پنټاګان راپور پر بسټ، د افغان ځواکونو لپاره د شپږ نوې A-29 ډوله جنګي الوتکو د جوړېدو چارې هم پیل شوي دي او AC-208 سپکې جنګي الوتکو د اخیستلو په خاطر هم بودیجه په پام کې نیول شوې ده.
د امریکا د پوځ د مرکزي قوماندانۍ مشر جنرال جوزف ووټل له دې وړاندې ویلي وو، چې د امریکا حکومت په پام کې لري چې افغان هوایي ځواک ته درې پنځوس عصري UH-60 یا بلک هاک هیلیکوپترونه ورکړي.
جنرال ووټل نږدې شپږ میاشتې مخکې د امریکا د سنا مجلس د پوځي خدماتو کمېټې ته وویل چې د افغان هوایي ځواکونو د پیاوړي کولو په وړاندیز کې ۸۱۴،۵ میلیون ډالر بودجې شامل دې او په پام کې ده حکومت له دغو پیسو څخه افغان هوایي ځواک ته درې پنځوس بلک هاک هیلیکوپترونه، دیرش ایم دی ۵۳۰ ایف جنګي هیلیکوپترونه، پنځه اي سي ۲۰۸ الوتکي او شپږ اي ۲۹ جنګي الوتکي برابرې کړي.
