په داسې حال کې چې د امریکا متحده ایالاتو استخباراتي ادارې او پوځ د طالب مشرانو د وژلو په خاطر پر نویو تګلارو غور کوي، اسلام اباد وایي د طالب مشرانو پر خلاف نور پوځي اقدامات به د سولې لپاره هلې ځلې له خنډ سره مخ کړي.
په اسلام اباد کې د پاکستان حکومت یوه باورې سرچینه رسنیو ته ویلي، چې اسلام اباد لاهم په افغانستان کې د امریکا له پوځي تګلارې سره مخالف دی.
نومړی د پاکستان ډیلي ټایمز ورځپاڼې ته ویلي، چې د طالب مشرانو ځپل به یو ناسمه کار وي ځکه د طالب مشرانو د وژلو ترڅنګ به له طالبانو سره د سولې لپاره مذاکرات ناممکنه وي.
دا په داسې حال کې ده چې په افغانستان کې میشت امریکایي ځواکونه په وروستیو کې ترهګرو پر ضد خپل بریدونه ګړندی کړي او د تازه راپورونو پر بنسټ امریکایي يواځې تیره میاشت ۷۵۱ بمونه د ترهګرو پر مواضعو غورځولي دي.
د امریکا متحده ایالاتو ولسمشر ډونالډ ټرمپ کابو دوه میاشتې مخکې د افغانستان او سویلي اسیا په اړه د واشنګټن نوې ستراتیژي په ډاګه کړه.
ولسشمر ټرمپ په افغانستان کې د امریکایي ځواکونو د ماموریت پر دوام او ترهګرو ډلو پر لمنځه وړلو یې ټینګار وکړ.
نوموړې په همدې حال کې د ترهګرو پر ضد د افغان امنیتي ځواکونو له هڅو او مبارزې ستاینه وکړه او له افغان حکومت او وویل چې د افغانستان او د افغان پوځ د تقویې په برخه کې به د امریکا مرستې ادامه ولري.
سرچینه:خامه