په افغانستان کې د طالبانو وسله والې ډلې د امریکا ولسمشر ډونالډ ټرمپ له خوا د بیت المقدس په هکله د پریکړې په اړه تند غبرګون وښود.
ولسمشر ټرمپ تیره ورځ وویل چې اوس بیت المقدس د اسراییلو پلازمېنې په توګه رسماً مني او د امریکا بهرنیو چارو وزارت ته لارښونه وکړه چې د یاد هېواد سفارت له تل ابیب نه بیت المقدس ته انتقال کړي.
هغه وویل که دواړه لوري اسراییل او فلسطینیان یې ومني، امریکا به د دوو دولتونو د جوړیدو ملاتړ وکړي.
د طالبانو ویاند ذبیح الله مجاهد په یوه بیان کې لیکلي چې یاد ډله د بیت المقدس په هکله د امریکا ولسمشر پرېکړه په کلکو ټکو غندي او خبرداری ورکړ چې دا پریکړه په ټوله نړۍ خصوصا په منځني ختیځ کي د شخړو اور ته لمن وهل دي.
نوموړی په ټولو اسلامي هیوادونو او مسلمانو ملتو غږ کوي چې له بیت المقدس څخه خپل حمایت اعلان کړي او د فلسطین د مظلوم ولس د مشروع مبارزي ملا تړ وکړي.
دا په داسې حال کې ده چې د فلسطیني ولسمشر محمود عباس له دې وړاندې خبرداری ورکړی و، چې دا به د سیمې لپاره ‘خطرناکې پایلې ‘ ولري.