د افغانستان جمهوري ریاست دفتر یا ارګ ماڼی وایي، د وسله وال پوځ اعلی سرقوماندانی د غونډې په لړ کې د کابل ښار امنیتي پلان په اصولو کې تائید شوی.
ارګ ماڼی په یوه بیان کې لیکلي، چې په غه غونډه کې چې د ولسمشر محمد اشرف غني په مشری جوړه شوی و، په ترڅ کې یې د هېواد د امنیتي او دفاعي بنسټونو مسوولینو په ټول هېواد کې د نظامي عملیاتو د پرمختګونو او په دې برخه کې د لاسته راوړنو په اړه جمهوررئیس ته معلومات ورکړل.
خبرپاڼه زیاتوي، چې دغه راز لوړ پوړو امنیتي مسوولینو د کابل ښار امنیتي پلان جمهوررئیس غني ته وړاندې کړ.
امنیتي مسوولینو وویل، د همغږي، انسجام، کشف او استخباراتو، د امنیتي او دفاعي ځواکونو پیاوړتیا، د پولیس ځواکونو موثر ځای پرځای کول او په دې سکتور کې هر اړخیزه اصلاحات د کابل ښار امنیتي پلان کې شامل دي.
د ارګ ماڼی به وینا، غونډې له مفصلو بحثونو وروسته د کابل ښار امنیتي پلان په اصولو کې تائید کړ او د هغه د موثر تحقق په خاطر یې لوړپوړو امنیتي مسوولینو ته لارښوونه وکړه چې د تطبیق په موخه د ټاکلي وخت چوکاټ په ګډون دې پر جزئیاتو کار وکړي او تر راتلونکو لسو ورځو دې هغه نهایي او ولس ته واوروي.
جمهوررئیس غني او د وسله وال پوځ اعلی سرقومندان د هېواد د امنيتي او دفاعي ځواکونو د هڅو د قدردانۍ ترڅنګ په هېواد کې د سراسري امنیت د ټینګښت او د دښمن د شومو پلانونو د دفعې په خاطر امنیتي او دفاعي مسوولینو ته لازمې لارښوونې وکړې.
