دا برید د ۲۱۵ میوند قول اردو د درییمې لوا لومړي کنډک مخ ته شوی دی.
د هلمند د والي ویاند عمر ځواک وایی، چې ځانمرګي برید کوونکي دا برید د مازدا لارۍ په وسیله کړی دی.
ښاغلي ځواک وویل " د نادعلي ولسوالۍ د شیرین جان چهار راهي ته ځېرمه د ملي پوځ د مرکز مخ ته د مازدا موټر په وسیله ځانمرګی برید شوی، د لومړنیو معلوماتو له مخې پېښه کې د څلورو سرتیرو د ټپي کیدو خبر مو تر لاسه کړی او د وژل شویو سرتیرو ارقام لا دقیق ندي".
د دغې چاودنې غږ پنځوس کیلو مېتره لیرې په لښکرګاه ښار کې هم اوریدل شوی.
د پېښې په سیمه کې له تیرو څو ورځو راهیسې د ګډو افغان ځواکونو له لوري نظامي عملیات هم دوام لري.
 هلمند یوه امنیتي مقام د نوم نه ښودلو په شرط اشنا رادیو ته وويل، چې په پېښه کې د ملي پوځ د ۸ سرتیري وژل شوي او ۱۱ نورو د ټپي کیدو معلومات دوی تر لاسه کړي دي.
نادعلي ولسوالي د لښکرګاه ښار په پنځوس کیلو میترۍ کې موقعیت لري، چې د هلمند له نا امنه ولسوالیو څخه بلل کیږي.
طالبانو د دغه برید مسولیت په غاړه اخیستی دی.
د دغې ډلې یو ویاند قاري محمد یوسف احمدي رسنیو ته په یوه استولې اعلامیه کې په دې برید کې د افغان پوځ د ۱۱۰ تنو د وژل کیدو او ټپي کیدو او هم د څلورو زرې وسایطو د ویچاړیدو ادعا کړې ده.