ولسمشر غني له عمران خان سره ټیلیفوني خبرې وکړې

په اسلامي اباد کې د افغانستان سفیر ډاکټر عمر زاخېلوال وویل، چې ولسمشر غني ښاغلي عمران ته په ټاکنو کې د بریا مبارکي ورکړه.
ډاکټر زاخېلوال زیاته کړه، چې ولسمشر غني د افغانستان د سولې او امنیت په اړه د ښاغلي عمران خان د څرګندونو هرکلی وکړ.
په همدې حال کې د تحریک انصاف ګوند دفتر په یوه بیان کې ویلي چې ولسمشر غني ښاغلي عمران خان ته بلنه ورکړه چې کابل ته سفر وکړي.
دا په داسې حال کې ده چې ښاغلي عمران خان دپنجشنبې پهورځ وویل چې د تحریک انصاف ګوند تر مشری لاندې حکومت به یې له خپلو ګاونډیو سره ښې اړیکې ولري.
عمران خان وویل، چې د ترهګرو په ضد او د جهاد په وخت کې یې جګړه تر نورو ډېر افغانان کړولي او دی غواړي چې د افغانستان او پاکستان ترمنځ سرحدي محدودیتونه لېرې کړي څو د دواړو هېوادونو خلک وکولی شي د اروپايي ټولنې د هېوادونو په څېر له یو بل سره اسانه تګ راتګ ولري.
د تحریک انصاف ګوند مشر دا هم وویل چې د پاکستان ثبات د افغانسان له سولې سره تړلی دی او له همدې امله پاکستان په افغانستان کې امنیت او ثبات غواړي.