د افغانستان په ولسمشریز ټاکنو کې به د بایومتریک سیستم وکارول شي

د ټاکنو د خپلواک کمیسیون منشي او ویاند سید حفیظ الله هاشمي د ټاکنو په کمیسیون کې یو خبري کنفرانس ته په وینا کې، چې د دغه کمیسیون رئیس او نور غړي هم حاضر وو خبریالانو ته وویل چې د رایه ورکوونکو بایومیټریک په ټاکنو کې د شفافیت تر ټولو غوره لار ده.
خو هغه زیاته کړه : " دې ته په کتو سره چې کمیسیون دا مهال د ولسي جرګې د ټاکنو په عملیاتي چارو بوخت دی، او بل خوا د ټاکنو ترسره کېدو نیټې ته یوازې ۷۰ ورځې پاتې دي، په دومره لنډه موده کې کمیسیون د راتلونکو ټاکنو لپاره د ټکنالوژۍ تدارک او پلي کول شونی نه بولي. "
د ټاکنو کمیسیون، د روان کال د تلې ۲۸ مه نېټه د ولسي جرګې او ولسوالیو شوراګانو د ټاکنو لپاره ټاکلې.
د ولسمشریزو ټاکنو لپاره د راتلونکې کال پسرلی یاد شوی دی.
ښاغلي هاشمي وویل: " د وخت کمښت ته په پام سره کمیسیون پرېکړه وکړه چې له ټکنالوژۍ څخه د ولسمشرۍ په ټاکنو کې کار واخیسستل شي تر څو وکولای شي په ولسمشریزو ټاکنو کې لا زیات شفافیت تامین کړي، چې ټاکل شوې د ۱۳۹۸ کال د وري پر ۳۱ مه نېټه ترسره شي."
په ټاکنو کې له بایومیټریک څخه ګټه اخیستنه، د ټاکنو له خپلواک کمیسیون څخه د افغانستان د سیاسي ګوندونو په غوښتنو کې راځي، چې د لا زیات شفافیت او په ټاکنو کې د مهندسۍ د مخنیوی لپاره پر دغه سیسټم ټینګار کوي.
د افغانستان د سیاسي ګوندونو بله غوښتنه پر ټاکنو د سیاسي ګوندونو موثره څارنه وه، چې حکومت منلې ده، خو د اوسني ټاکنیز نظام د بدلون غوښتنه، چې رایه په کې نه شي لېږدول کېدای، په مختلط او تناسبي سیسټم اړول تر اوسه نه ده منل شوې.