دخپریدو نیټه :يکشنبه ۲۸ اسد ۱۳۹۷ ساعت ۱۲:۲۳
د مطلب کود : 169104
افغانستان د خپلواکۍ ورځ ولمانځله
د افغانستان د خپلواکی ۹۹ کلینه په پلازمېنه کابل او نورو ولایتونو او ښارونو کې یې د بېلا بېلو مراسمو په ترڅ کې ولمانځل شوه.

ولسمشر محمد اشرف غني نن له غرمې مخکې د هېواد د خپلواکۍ د بیا اخیستو د  ۹۹یمې کلیزې په درناوي ملي دفاع وزارت کې د خپلواکۍڅلي ته د ګلونو ګېډۍ کېښوده.
د افغانستان جمهوري ریاست دفتر یا ارګ ماڼی په یوه بیان کې ویلي چې په دې مراسمو کې جمهوررئیس غني چې د ملي دفاع وزیر ډګر جنرال طارق شاه بهرامي یې ملتیا کوله او د ملي پوځ سرتېري په منظمو لیکو کې د هېواد له درې رنګه بیرغ سره د درناوي په دود ولاړ وو، د بانډو ټیم ملي سرود غږاوه، د خپلواکۍ د بنسټګر اعلیحضرت غازي امان‌الله خان د هېواد د خپلواکۍ د معرکې د ټولو اتلانو، شهیدانو او غازیانوپه درناوي یې د خپلواکۍ څلي ته د ګلونو ګېډۍ کېښوده.
خبرپاڼه زیاتوي، چې په دغو مراسمو کې اجرائیه رئیس ډاکټر عبدالله عبدالله، د جمهوررئیس لومړي مرستیال ستر جنرال عبدالرشید دوستم، د هېواد مخکېني جمهوررئیس حامد کرزي، د شاه امان‌الله خان لور شهزادګۍ هندیې، د اجرائیه ریاست دویم مرستیال محمد محقق، د سترې محکمې رئیس او قاضي القضات قانونپوه سیدیوسف حلیم، د ملي امنیت سلاکار محمد حنیف اتمر، د علماو د سراسري شورا رئیس مولوي قیام الدین کشاف، د کابینې یو شمېر غړو او د جمهوري ریاست سلاکارانو، د ملي شورا او سترې محکمې یو شمېر غړو، د وسله‌وال پوځ یو شمېر جنرالانو او افسرانو او په کابل کې د دوستو هېوادونو یو تعداد سفیرانو او استازو ګډون درلود.
 
سرچينه : د صدای افغان خبری آژانس(آوا)
https://avapress.com/vdcgzy9qtak93q4.1gra.html
تبصره پوسټ کړئ
ستاسو نوم
ستاسو دبرېښنا ليک پته