کابل ښار کې د بېلا بېلو جرمونو په تور ۳۴۸ کسان نيول شوي

د کابل امنیه قوماندانی په یوه باین کې ویلي، چې د کابل ۱۰۱ آسمایی زون پولیسو د تیرې یوې میاشتې په ترڅ کې د بېلا بېلو جرمونو په تور لسګونه تنه نیولي دي.
خبرپاڼه زیاتوي، چې دغه مجرمین چی شمېر یې ۳۴۸ تنو ته رسېږي د ښار له بېلا بېلو سیمو څخه نیول شوي دي.
د سرچینې په وینا، په دغه لړ کې له ۳۰ کیلو ګرامو څخه زیات نشه یي توکې ترلاسه شوي او ۳۰ میله وسلې له یو اندازه نظامي تجهیزاتو سره لاسته راغلي دي.
په خبرپاڼه کې دا هم ویل شوي، چې پولیس توانیدلې چې ۴۰۶ موټر ګمرک ته واستوي او ۱۰۰۰ جعلي نمبر پلیټونه ترلاسه کړي او همدا راز په دغه لړ کې ۷۰۰ موټر سایکله چې قانوني اسناد یې نه درلودل درول شوی دي.
د کابل ولایت امنیې قوماندانی په وینا، درې ټنه مهمات د ډایاګ پروسې ته هم سپارل شوي دي.