ولسمشر غنی ویډیو کنفرانس له لارې غزنی ولایت ملکی او نظامی مسؤولانو سره وروستیو امنیتی پرمختګونو په اړه خبری وکړ

ارګ ماڼی په یوه بیان کې ویلي، چې په دغه ویډیويي کنفرانس کې چې یو شمېر لوړ پوړو دولتي چارواکو حضور درلود، د غزني والي، د ۲۰۳ تندر قول اردو قوماندان، د پولیسو د ۳۰۳ سپین غر زون قوماندان، د غزني امنیه قوماندان او د ملي امنیت رئیس ددغه ولایت د عمومي امنیتي او ټولنیز وضعیت، په اړه معلومات وړاندې کړل.
خبرپاڼه زیاتوي، چې د غزني والي جمهوررئیس ته په دغه ولایت کې د دولتي ادارو د فعالیت د پیلیدو او اړمنو ته د بشري مرستو د څرنګوالي په اړه معلومات ورکړل او وې ویل، مخابراتي شبکې، د اوبو شبکې او صحي مراکز فعال شوي دي.
د ارګ ماڼی په وینا، ورپسې د کورنیو چارو وزارت ستر امنیتي معین، د ملي دفاع وزارت لوی درستیز، د ملي امنیت عمومي رئیس او د سیمه‌ییزو ارګانونو د خپلواکې ادارې رئیس هر یو د خپلو اړوندو ارګانونو د فعالیتونو، پرمختګونو او ستونزو په اړه سپارښتنې او نظریات شریک کړل.
ولسمشر غني د دوی د راپور له اورېدو وروسته په غزني ولایت کې د هېواد د امنیتي او دفاعي ځواکونو میړانه او زړورتوب وستایه، ويې ویل چې د غزني ولایت ستونزو ته د رسېدنې په موخه به ټول لازم اقدامات ترسره شي او د اړوندو ادارو مسوولانو ته یې لارښوونه وکړه چې د خلکو ستونزو ته جدي رسیدګي وکړي.
د ارګ ماڼی په خبرپاڼه کې د ولسمشر غني په حواله راغلي، چې ملي امنیتي او دفاعي ځواکونو تل په خورا سختو شرایطو کې له ځمکنۍ بشپړتیا او خلکو څخه د دفاع په لار کې قرباني ورکړې ده او په دې یې خوښي وښوده چې وسله‌وال ځواکونه د افغانستان د ټولو اقشارو ملاتړ له ځان سره لري او په عالي روحیه د دښمنانو شوم پلانونه خنثا کوي.