کد QR مطلبدریافت صفحه با کد QR

طالبانو په فاریاب کې د ملي پوځ پر کاروان برید کړی

Afghan Voice Agency(AVA) , 5 سنبله 1397 ساعت 17:39

د افغان ملي پوځ کاروان چې د فاریاب ولایت د غورماچ ولسوالۍ نه د قیصار ولسوالۍ پر لور روان و طالبانو پرې د دوشنبې په سهار (اگست ٢٧) حمله وکړه.



د افغانستان د دفاع وزارت د یوې اعلامیې په خپرولو سره ویلي چې دغه نښته د دوشنبې د سهار په شاوخوا ۹:۱۵ بجې د غوراچ ولسوالۍ د چهل گزي په ساحه کې شوې ده. د اعلامیې له مخې یاد شوي کاروان د افغان هوایي ځواک په ملاتړ طالبان "سخت کوبلي" دي.
د افغانستان په شمال کې د ٢٠٩ شاهین قول اردو ویاند حنیف رضایي د امریکا غږ ته وویل چې طالبانو د دغه ٣٥٠ کسیز پوځي کاروان د لارې په اوږدو کې مایونه ایښي وو.
ښاغلي رضایي ویلي دي چې پدغه نښته کې د ملي اردو درې سرتیري او د طالبانو ٥۴ جنگیالي وژل شوي دي. هغه همداشان وویل چې اوس دغه کاروان د قیصار ولسوالۍ ته رسیدلی دی.
د افغانستان د دفاع وزارت اعلامیې نه ده واضیح کړې چې د ملي اردو کاروان په کوم مقصد د قیصار ولسوالۍ ته روان و، خو یو شمیر ولایتي مقاماتو ویلي چې ځواکونه د غورماچ ولسوالۍ نه د وتلو په حال کې وو.
د فاریاب د ولایتي شورا مرستیال صبغت الله سیلاب امریکا غږ ته ویلي چې د قواو د کموالي او امنیتي گواښونو د زیاتیدو په وجه ځواکونه د غورماچ ولسوالۍ نه ووتل.
ښاغلي سیلاب زیاته کړه، د ملي اردو کاروان چې د شاهین قول اردو پورې مربوط دی باید ساحه خوشې کړی وای او مسؤلیت یې د هرات د ظفر قول اردو یو کنډک ته سپارلی وای. خو د امریکا غږ خبریال رپوټ ورکوي چې تر اوسه د ظفر قول اردو کنډک پدې ولسوالۍ کې ندی ځای پر ځای شوی.
د طالبانو یو ویاند په ټویټر کې په یوه اعلامیه کې ادعا کړې چې پدې حمله کې یې د ملي اردو څو وسایط تخریب کړي دي او یو شمیر نور وسایط او مهمات د طالبانو لاس ته ورغلي دي.
 


د مطلب کود: 169529

دمطلب پته :
https://www.avapress.com/ps/news/169529/طالبانو-په-فاریاب-کې-د-ملي-پوځ-پر-کاروان-برید-کړی

آوا
  https://www.avapress.com