برتانیا د افغان هوایي ځواک د وړتیاو د لوړیدو په برخه کې مرسته کوي

د ملي امنیت شورا په یوه اعلامیه کې ویلي، چې په دغه کتنه کې، چې په ارګ کې د ملي امنیت د شورا په دفتر کې شوې، د برتانیا د دفاع وزیر ګوین ویلیامسون له ترهګرۍ سره په مبارزه کې د افغان ځواکونو له قربانیو ستاینه کړې او ښاغلي محب ته یې افغان ځواکونو سره د خپلو همکاریو له دوام څخه ډاډ ورکړی.
د برتانیا د دفاع وزیر ویلي، هڅه کوي، چې د افغان ځواکونو په ځانګړي توګه د افغان هوايي ځواک مهارتونو او وړتیاوو په پورته کولو کې مرسته وکړي.
ښاغلي ویلیامسون همداشان ویلي، چې هېواد یې چمتو دی، چې له افغان ځواکونو سره د پرمختللیو طبي امکاناتو د برابرولو په برخه کې هم همکاري وکړي.
د افغانستان د ملي امنیت شورا په اعلامیه کې د ښاغلي ویلیامسون له قوله ویل شوي،چې "د بریتانیا په کوڅو او سړکونه کې هغه مهال د کامل آمن احساس کیدلی شي، کله چې د افغانستان په کوڅو او سړکونو کې د آمن احساس وشي".
د دې اعلامیې له مخې د افغانستان د ملي امنیت سلاکار حمدالله محب د برتانیا دفاع وزیر ته ویلي،چې د افغان حکومت په افغانستان کې د آمن او ثبات ټینګیدو ته ژمن دی.
دا اعلامیه وايي "ښاغلي محب وویل، چې نه غواړي د افغانستان راتلونکي نسلونه په جنګ او کړکیچ کې تیر کړي".
ښاغلي محب ویلي،چې له هرې ممکنه لارې او فرصت څخه به ګټه پورته کړو ترڅو په افغانستان کې جنګ او انسان وژنه ختمه شي.
کابل ته د برتانیا د دفاع وزیر سفر دمخه نه وو اعلان شوی او د نورو افغان چارواکو سره د هغه د لیدو کتو په اړه هم ر سنیو ته معلومات نه دي ورکړل شوي.