کد QR مطلبدریافت صفحه با کد QR

له اروپا، چین، روسیې، دوبۍ او د هند له ټولو ښارونو سره نوي هوایي دهلېزونه رامنځته شوي دي

د صدای افغان خبری آژانس(آوا) , 26 سنبله 1397 ساعت 16:38

په مالي او بانکي چارو کې د جمهوري ریاست ستر مشاوریت د هیواد له هوایي شرکتونو، صنایعو او سوداګرۍ خونې سره اروپا، چین، روسیې، دوبۍ او د هند ټولو ښارونو ته د هوایي دهلېزونو د رامنځته کېدو هوکړه لیکونه لاسلیک کړي دي. د نویو هوایي دهلېزونو د رامنځته کېدو موخه یادو هیوادونو ته د افغانستان د صادراتو د کچې لوړول دي.


په مالي او بانکي چارو کې د جمهوري ریاست د مشاوریت دفتر د عامه اړیکو مسوول، سمیر رسا د دوشنبې په ورځ د حکومت د اطلاعاتو او رسنیو په مرکز کې د یوه خبري کنفرانس پر مهال وویل:" نېږدې راتلونکې کې به اروپا، چین، روسیې، دوبۍ او د هند ټولو ښارونو ته د نویو هوایي دهلېزونو له لارې سوداګریز توکي ولېږدول شي."  
له دې مخکې له ترکیې، سعودي عربستان، قزاقستان او د هندوستان له ډهلي او ممبي ښارونو سره هوایي دهلېزونه رامنځته شوي وو، چې له پیل څخه تر دې مهاله د دغو هوایي دهلېزونو له لارې ۱۶۹ الوتنې ترسره شوې دي. په دې الوتنو کې د تازه او وچو مېوو، د هنګ طبي بوټو، قالینو او پوستکو په ګډون ۲۹۶۱ ټنه سوداګریز توکي لېږدول شوي دي.
رسا د اقتصاد د عالي شورا لخوا د صنعتي پارکونو د پالیسې تصویب ته په اشارې سره وویل، اوس مهال د ۱۱ ولایتونو په ۱۳ صنعتي پارکونو کې پانګې اچوونکو ته د ځمکو د وېش زمینه برابره شوې ده. نوموړي زیاته کړه، چې ډېر ژر به د باریک آب په صنعتي پارک کې هغو ۱۶ شرکتونو ته چې په شرایطو برابردي د ځمکو د وېش لړۍ پیل شي.
په مالي او بانکي چارو کې د جمهوري ریاست د مشاوریت دفتر د عامه اړیکو مسوول، د افغانستان او هندوستان د سوداګریز نندارتون، چې د څلورو ورځو لپاره د ممبي په ښار کې جوړ شوی و، د پانګې اچوونکو لپاره یوه ښه فرصت وباله او زیاته یې کړه، چې په هغه کې د ۳۰۰ افغان سوداګرو ۱۶۰ غرفې، ۱۲۰۰ هندي شرکتونو او د نړۍ له بېلابېلو هیوادونو څخه څه باندې ۱۰۰ کسانو ګډون کړی وو.
افغان سوداګرو په دې نندارتون کې د قالینو، وچو مېوو، کانونو، روغتیا، انرژۍ، ټکنالوژۍ او خدمتونو په برخو کې سلګونه تړونونه لاسلیک کړل.  
 


د مطلب کود: 170964

دمطلب پته :
https://www.avapress.com/ps/news/170964/له-اروپا-چین-روسیې-دوبۍ-او-د-هند-ټولو-ښارونو-سره-نوي-هوایي-دهلېزونه-رامنځته-شوي-دي

آوا
  https://www.avapress.com