د ترکیې په لويديځ ازمير ولایت کې د غیرقانوني کډوالو یو لارۍ موټر چپه شوی چې ۲۲ تنو کډوالو خپل ژوند له لاسه پکې ورکړی او ۱۳ تنه نور ژوبل شوي دي.

سیمه ییزو رسنیو ویلي، موټرچلونکي د موټر کنترول له لاسه ورکړ او د سړک غاړې موانعو سره تر ټکر وروسته د اوبو یوه ژور کانال ته ور ولوېدو.

د کډوالو د لېږد موټر له ايدن ښار څخه ساحلي ازمير ښار ته پر لاره و چې نن سهار دا پېښه رامنځ ته شوه، ویل شوي، موټر ۲۰ متره ژور د اوبو رسونې کانال ته ورخوشی شوی.

تر پيښي وروسته سیمې ته د ژغورنې کارکونکي رسېدلي او مړي او ټپیان يې لېږدولي دي.

په  وژل شویو او ټپیانو کې ماشومان هم شامل دي، تراوسه د کډوالو هویت څرګند شوی نه دی.