د بلخ ولایت د چهار بولک ولسوالی په مربوطاتو کې د افغان امنیتي او دفاعي ځواکونو او وسله والو طالبانو ترمنځ نښته شوې، چې په ترڅ کې یې پنځه تنه وسله والو ته مرګ ژوبله اوښتې ده.

په شمال کې د ۲۰۹ شاهین قول اردو په یوه بیان کې ویلي، چې نښته تېره شپه ناوخته د ګور تپې ولسوالی په مربوطاتو کې رامنځته شوې ده.
خبرپاڼه زیاتوي، چې د نښتې په پایله کې د طالبانو نومول شوی ولسوال د ګل نبي ډلې اړوند دوه وسله وال وژل شوي او درې نور ټپيان شوي دي.
د ۲۰۹ شاهین قول اردو په وینا، په دغه نښته کې د وسله والو دوه موټرسایکلونه هم لمنځه تللي دي.
د وسله والو طالبانو په ګډون د دولت ضد وسله والې ډلې تر اوسه په دې اړه څه نه دي ویلي.
بلخوا د ۲۰۹ شاهین قول اردو وایي افغان امنیتي او دفاعي ځواکونو وړمه شپه د ببغلان ولایت د بورکې ولسوالی په مربوطاتو کې یو کړی ماین کشف او شنډ کړی دی.