ولسمشر د بامیان- دوشي د سړک جوړولو پرانسته وکړه

د صدای افغان خبری آژانس(آوا) , 19 عقرب 1397 ساعت 15:34

د هېواد ولسمشر بامیانو ته په خپل دوه ورځني سفر کې د شنبې پر سهار( د لړم پر ۱۰) د خپل دوه یم مرستیال سروردانش، د دغه ولایت د والي محمد طاهر زهیر او یو شمېر وزیرانو پر ملتیا د بامیان- دوشي د سړک جوړولو چارې پرانستې.



د ټولګټو وزیر یما یاري ویلي، چې د دوشي- بامیان سړک ۲۵ کیلومتره اوږدوالی لري، چې د نړیوال بانک د ۲۷ میلیون دالرو پر لګښت یې کار د بغلان ولایت له دوشي پیل شوی دی.  
ولسمشرۍ د یوې خبرپاڼې په خپریدو څرګنده کړې، چې  د سالنګ لویه لار به د بیا رغونې لپاره وتړل شي او د دوشي- بامیان او پروان- بامیان لارې به د سالنګ د بدیل په توګه وکارول شي.
دا په داسې حال کې ده، چې ولسمشر غني د خپل دوه یم مرستیال او یو شمېر وزیرانو پر ملتیا تېره ورځ دایکندي ولایت ته ولاړ او دغه ولایت یې دوه یمې درجې ته لوړ کړ. ولسمشر او ورسره پلاوي یې د همدې ورځې له غرمې وروسته بامیان ولایت ته سفر پیل کړ او د دغه ولایت له ولسوالانو، امنیتي مسوولینو، استادانو او علماوو سره یې ولیدل.
ولسمشر په خپلو لیدنو کې بامیان ولایت ته د ورغلیو لارو پر امنیتي خونديتوب ټینګار وکړ او څرګنده کړې یې ده، چې دغو لارو ته به پوره پاملرنه هم وشي.
 


د مطلب کود: 173781

دمطلب پته: https://www.avapress.com/ps/news/173781/ولسمشر-د-بامیان-دوشي-سړک-جوړولو-پرانسته-وکړه

آوا
  https://www.avapress.com