په ننګرهار کې د ۹ بهرنیانو په ګډون څلیریشت داعش جنګیالي ملي امنیت ته تسلیم شوي او لسګونه میله سپکه او درنده وسله یې سرتېرو ته سپارلې ده.

د ننګرهار والي ویاند عطاالله خوږیاڼی وايي؛ د دغه ولایت په نازیانو کې د داعش ۲۴ جنګیالي تسلیم شوي، چې ۹ یې بهرني اتباع، پاتې ۱۵ یې د سولې له بهیر سره یو ځای شوي او لسګونه میله وسله یې سرتېرو ته سپارلې ده.
د نوموړي د څرګندونو له مخې؛ د نازیانو ولسوالۍ ګنې سیمې د داعش له جنګیالیو سره وې؛ خو له تېرو دولس ورځو راپدیخوا په کې داعش ضد پراخ عملیات روان دي، چې په پایله کې یې د نازیانو اړوند سیمې له داعش تصفیه شوې دي.
هغه زیاته کړې؛ په تسلیم شویو جنګیالیو کې نهه بهرني اتباع شته، چې اړوند هېوادونو ته د سپارلو په موخه کابل ته لیږل شوي دي. پاتې پېنځلس نور یې د اچین، نازیانو، هسکې مینې او کوټ ولسوالۍ اوسیدونکي دي، چې هر یوه یې له دوه او درې کالونو راپدیخوا د داعش په لیکو کې هڅې کړې دي.
د سولې له بهیر سره یوځای شوی جنګیالی بنګ ګل وايي، له خپلو کړنو ډېرستړی او پښېمانه يم.
مسوولین وايي، په ننګرهار کې د امنیتي حالت د ښوالي په موخه له پخوا پر شپينو عملیاتو سربېره په ځینو ولسوالیو کې چاڼیزعملیات هم ډېر شوي او خلک سیمه ییزو پاڅونونو ته هڅول شوي؛ خو ترڅنګ یې د سولې دروازې خلاصې دي، چې په تېرو ۵ میاشتو کې ۲۱۵ وسلوالو له جګړې لاس اخستی.