په کندهار کې د ملي اردو هلیکوپټرې لوېدو پېښه کې۲تنه وژل شوي

د کندهار يوه لوړ پوړي امنيتي مقام د نوم نه ښودلو په شرط اشنا راډيو ته وويل چې هلیکوپټرې معروف ولسوالۍ ته اکمالات کړي و چې د بېرته الوتنې پرمهال یې د تخنیکي ستونزې له امله سقوط کړی دی.

پر همدې مهال د کندهار والي ویاند عزیز احمد عزیز هم اشنا راډیو ته د پېښې په تائید سره وویل چې یادې هلیکوپټرې معروف ولسوالۍ ته اکمالات کول چې لوېدلې ده.
عزیز وویل چې په دې اړه د دوی څېړنې روانې دي او وروسته به له رسنیو سره معلومات شریک شي.
خو تر اوسه لا معلومه نه ده چې د هليکوپترې عملې ته هم کوم زيان رسېدلی او کنه.
معروف د کندهار په جنوب ختيځ ۱۸۰ کېلو مترۍ کې له پاکستان سره پر پوله نا امنه ولسوالي ده.
دا په روان کال کې د افغان هوايي پوځ اتمه هلیکوپټر ده چې د تخینکي ستونزو له امله سقوط کوي.

تر دې مخکې په یوې تازه پېښه کې د فراه په انار درې ولسوالۍ کې د افغان هوايي پوځ د یوې هلیکوپټرې د لوېدو پېښه کې ۲۵ ملکي‌ او نظامي چارواکي ووژل شول.