ملګري ملتونه په سوله کې د ښځو د فعاله ګډون غږ کوي

په کابل کې د پرانستو ورځو د وروستۍ غونډې پرمهال، چې د یوناما او د جنسیتي برابرۍ او د ښځو پیاوړي کولو په چارو کې د ملګرو ملتونو ادارې (UN Women) له خوا یې کوربه توب کیده، د جنسیتي برابرۍ ۳۰ فعالینو له ملګرو ملتونو سره د سولې لپاره خپلې ژورې اندیښنې او لومړیتوبونه شریک کړل.
په دې غونډه کې ګډون کوونکو د سولې پروسو کې د سولې جوړونکو، فعالانو، مدافعینو، منځګړیتوب کوونکو او مذاکره کووونکو په توګه د ښځو د معتبر ګډون پروړاندې ننګونې په ګوته کړې، او همدارنګه هغه فرصتونه یې په ډاګه کړل چې د ښځو غږ اوچت کړي او ډاډ ترلاسه کړي چې ښځې د مذاکراتو په میز کې ګډون لري.
په افغانستان کې د ملګرو ملتونو د ښځو چارو ادارې مشرې، اتیلا میلر وویل: " کله چې میرمنې مشري کوي او د سولې په بهیر کې برخه اخلي، نه یواځې سوله اوږد مهاله کیږي، بلکې ښځې هم حق لري چې په افغانستان کې د سولې خبرو اترو کې برخه واخلي. د افغانستان راتلونکي په اړه هیڅ پریکړه باید د ټولو اتباعو د بشپړ ګډون پرته ترسره نه شي، کوم چې د دوی راتلونکې اغیزمنوي، او همدارنګه د سولې هیڅ یو بهیر به د ښځو د مستقیمې ښکیلتیا پرته بشپړ او تلپاتې نه وي."
د جنسیتي مساوات مدافعین یادونه کوي چې، د کورنۍ نارینه غړو لپاره عادي خبره ده تر څو د کور د ښځینه غړو له کور څخه بهر په هر ډول فعالیتونو بندیز ولګوي، او ټینګار کوي چې د ښځو بشري حقونو ته د درناوي، ساتنې او پیاوړتیا په برخو کې پاتې راتلل او د دوي پر وړاندې دوامداره تبعیض په افغانستان کې د شخړو د حل په برخه کې د دوی د ګډون وړتیا محدودوي.
د غونډې ګډونوالو د سولې په بحثونو کې د ښځو غږونو اوریدو په وړاندې د خنډونو له منځه وړلو د اړتیا په اړه خبرې وکړې. همدارنګه عمومي ناامني او د ژورنالستانو، د ښځو د حقونو فعالینو او د ښځو لوړ پوړو مشرانو په ګډون د ښځو د بشري حقونو د مدافعینو پر وړاندې هدفي بریدونه هغه خنډونه و، چې ګډونوالو یې یادونه وکړه.
پرانستې نړیواله ورځ په ۲۰۱۰ کال کې رامنځ ته او د دې لپاره ډیزاین شوې تر څو د ښځو، سولې، او امنیت په اړه د ملګرو ملتونو د امنیت شورا د پریکړو په پلي کولو کې د نړۍ په کچه د ملګرو ملتونو د مشرتابه او د ښځو سازمانونو او د ښځو د جنسیتي برابرۍ مدافعینو ترمنځ د خبرو اترو مرسته وکړي.