د خوش تیپې کانال، کنړ او پکتیکا ته د برېښنا د لېږد او سب سټېشنونود جوړولو تفاهم لیکونه لاسلیک شول

په دې مناسبت په چهار چنار ماڼۍ کې په جوړو شویو مراسمو کې  چې د حکومت اجرائیه رئیس ډاکټر عبدالله عبدالله او یو شمېر مقاماتو او د بېلابېلو ادارو مسوولینو هم حضور درلود، یاد تفاهم لیکونه د جمهور رئیس ستر سلاکار او د مالیې سرپرست وزیر ډاکټر محمد همایون قیومي، د کرنې او مالدارۍ وزیر نصیر احمد دراني، د امریکا سفیر، د امریکا د پرمختیایي ادارې مرستیال،  د اسیا پراختیایي بانک رئیس او د افغانستان برېښنا شرکت رئیس لاسلیک کړل.
د خوش تیپې د اوبو لګولو او برېښنا د تولید پروژه ۲۷۰ کیلو متره اوږده ده چې ۵۰۰ زره هکتاره کرنیزه ځمکه خړوبوي. کرنې او انرژۍ وزارتونه او د چاپیریال ساتنې اداره د دغې پروژې ونډه وال دي. د دغه کانال مطالعه په کندز، جوزجان او بلخ کې د امریکا متحدو ایالاتونو پرمختیایي ادارې د دوه میلیون ډالرو په مالي مرسته په ۱۲ میاشتو کې بشپړېږي.
همدارنګه له ننګرهار څخه کنړ ته د برېښنا د لېږد او د سب سټېشن جوړولو پروژه چې په دوه کالو کې به بشپړه او۲۶ زره کورنۍ ورڅخه مستفیدې شي. دغه پروژه د اسیا پراختیایي بانک د ۶۰ میلیون ډالرو په مالي مرسته جوړېږي.
له غزني څخه پکتیکا ته د برېښنا د مزو د غځولو او په پکتیکا کې د سب سټېشن جوړولو پروژه د اسیا پراختیایي بانک په ۶۰ میلیون ډالر مالي مرسته په دوه کالو کې جوړېږي چې په مرکز ښرنه او ارګون کې به له ۳۰ زره زیاتې کورنۍ ورڅخه مستفیدې شي.