هند: د افغانانو په مشرۍ او مالکیت له افغان سولې ملاتړ کوو

د صدای افغان خبری آژانس(آوا) , 22 جدی 1397 ساعت 10:26

هند وايي، د افغانستان په وړاندې یې دريځ با ثباته دی او د دغه هېواد د سولې له پروسې ملاتړ کوي.



د افغانستان د سولې په چارو کې د امریکا د بهرنیو چارو وزارت ځانګړي استازي زلمي خلیلزاد له هندي چارواکو سره د افغانستان د سولې د پروسې په اړه خبرې کړي.
د هند د بهرنیو چارو وزارت ویاند روویش کومار پرون یوه خبري کنفرانس ته وویل چې هندي چارواکو ښاغلي خلیلزاد ته د سولې په برخه کې له خپلو همکاریو ډاډ ورکړ.
نوموړي وویل:
"ښاغلي خلیلزاد د بهرنیو چارو وزیرې سوشما سوارج او بهرنیو چارو سکرتر ویجې ګوکهالي سره په دې خبرې وکړې چې امریکا څنګه په افغانستان کې د سولې د ټينګښت او پخلاینې هڅه کوي، موږ له خپله اړخه ډېره ښه واضح کړه چې په افغانستان کې د سولې او پخلاینې پروسه باید د افغانانو په مالکیت، مشرۍ او کنټرول کې وي، د افغانستان په اړه زموږ دریځ معلوم او ډېر ثابت دی، هند د افغانستان د سولې او پخلاینې له پروسې ملاتړ کوي. "
ښاغلي کومار وویل، د هند په دریځ کې هېڅ بدلون نه دی راغلی او تل به د افغانستان د سولې د پروسې همکار وي.
 


د مطلب کود: 177676

دمطلب پته: https://www.avapress.com/ps/news/177676/هند-د-افغانانو-په-مشرۍ-او-مالکیت-له-افغان-سولې-ملاتړ-کوو

آوا
  https://www.avapress.com