چارواکي: کونړ کې۳۴۰۰۰ ماشومان د پولیو ضد له واکسینه بې برخې پاتي

دوی وايي، اوس يې په پنځو ولسوالیو کې یاد کمپاین بیا پیل کړی، خو دا ځل واکسین د څاڅکو پر ځای د زرق له لارې ماشومانو ته ورکول کېږي
د کونړ د عامې روغتیا رئیس ډاکټر عزیزالرحمن ساپي د دوشنبې په ورځ ازادي راډیو ته د نوي پیل شوي کمپاین په اړه وویل:
"زرقي او د خولې له لارې واکسین دواړه مؤثر دي، خو په ځینو مواردو کې زرقي واکسین زیات اغېز کوي، اوس مو ۵ ولسوالۍ«چپه دره، ماڼوګی، وټه‌پور، شیګل او مروره» د زرقي واکسین پروګرام کې داخلې کړي."

هغه وايي، ځکه يې په ۵ ولسوالیو کې یاد کمپاین پیل کړی چې په‌دغو ولسوالیو کې یا د فلج ناروغۍ ویروس موجود دی او یا هم د کوزې پښتونخوا د باجوړ سیمې سره شریکه پوله لري او هلته د پولیو مثبتې پېښې شتون لري.
د عامې روغتیا رئیس وايي، په یو شمېر سیمو کې د شته امنیتي ستونزو او واکسینونو سره د موجوده مخالفتونو له امله په تېر کمپاین کې له دوی نه ۳۴۰۰۰ ماشومان له واکسینونو څخه بې برخې پاتې شوي دي.
په کونړ کې د واکسینونو د پروګرام د عامه پوهاوي مسؤل ډاکټر اسدالله فضلي وايي:
"ولسونه، قومي مشران او د ټولنې نور غړي دوی سره همکار دي، خو د امنیت نشتوالی او د یو شمېر وسله‌والو ډلو شتون يې ستونزې زیاتې کړي."
د عامې روغتیا مسؤلین وايي: تېر کال په کونړ کې د پولیو درې مثتبې پېښې موجودې وي، که څه هم چې په نوي کال کومه مثبته پیښه نه‌ده موندل شوې، خو د ویروس موجودیت او ماشومانو ته د واکسینونو نه رسېدو سره د دې وېره شته چې سږ کال هم یو شمېر ماشومان په‌دغه لاعلاجه ناروغۍ اخته شي.