د کندز ځایي چارواکي وايي، د کندز په ګلتپه ولسوالۍ او د دغو ولایت په تلوکه سیمه کې د وروستیو نښتو په پایله کې د ۸۵ طالب وسله والو د وژل کیدو تر څنګ ۱۴ ملکیان چې ښځې او ماشومان پکې دي هم وژل شوي دي.

د کندز د ولایتي شورا مرستیال رسنیو ته ویلي د ګډو ځواکونو په دغو هوایي بریدونو کې د ښځو او ماشومانو په ګډون ۱۴ ملکیان وژل شوي دي.
دغه پیښه د امریکایي سرتیرو یوه ویاند هم نیوریاک ټایمز ته په مرکه کې، دغلته د یوشمېر ملکي وګړو د وژل کیدو خبره تائید کړې ده.
خو د دغو ځواکونو ویاند د ملکي وګړو په وژنه کې طالبان پړه بللي دي.
ده ویلي:”طالبان د عامو خلکو په کورونو کې پټ شوي وو او پرته له دې چې د غیر نظامیانو د ژوند په اړه فکر وکړي په سیمه کې د خلکو منځ کې کښته پورته تلل.”
د کندز ښار ته څېرمه په تلوکه سیمه او د دغو ولایت په ګلتپه ولسوالۍ کې د طالبانو پر واړندې د افغان ځواکونو او بهرنیو قوتونو ګډ هوايي او ځمکني عملیات له درې ورځو راهیسي دوام لري.